ԵՐԵՎԱՆ, 11 դեկտեմբերի — Sputnik. Երկարատև ջրանջատումներ ավելի հաճախ մարզերում են գրանցվում, քան Երևանում։ Դրա վկայությունն է «Վեոլիա ջուր» ընկերության` 2019թ–ի երրորդ եռամսյակի հաշվետվությունը։
Հուլիսից սեպտեմբեր ժամանակահատվածում ամբողջ հանրապետությունում արձանագրվել է մոտ 900 ջրանջատում, որից մոտ 340–ը` Երևանում։ Դա շատ թե քիչ համամասնական է բնակչության բաշխվածությանը (Երևանում բնակվում է երկրի բնակիչների մոտ մեկ երրորդը)։ Բայց մայրաքաղաքում ջրանջատումներն ավելի արագ են ավարտվում։ Ավելի քան 15 ժամ տևած մոտ 20 ջրանջատումներից ընդամենը երեք–չորսն են բաժին ընկել Երևանին։ Ինչո՞վ է դա պայմանավորված։
«Վեոլիա ջուր» ընկերության մամուլի քարտուղար Մուրադ Սարգսյանը Sputnik Արմենիայի հետ զրույցում նշեց, որ մոտ 20 տարի առաջ ջրանջատումները նույնքան երկար էին տևում նաև Երևանում։
Տարեցների ու լռության գյուղը. ինչպես են Լիճքում աստիճանաբար մոռանում մանկան ծիծաղը
2000թ–ին սկսեցին վերանորոգել քաղաքի փոքր կենտրոնի ցանցը։ Այդ ժամանակ մի բակում խողովակները նորոգելու համար ստիպված էին լինում անջատել կենտրոնի կեսի ջուրը, որովհետև ջրմուղ փականների համակարգը գրեթե չէր գործում։ ԽՍՀՄ–ի փլուզումից հետո ոչ ոք չի հետևել այդ փականներին, և դրանք ժանգոտել են, փչացել կամ ուղղակի գողացվել են։
«Անցած տարիներին մենք վերականգնել են այդ փականների համակարգը և հիմա կարող ենք իրականացնել մեկ–երկու շենքի լոկալ ջրանջատում։ Բայց դա` Երևանում, բայց մարզերում, որտեղ մենք սկսել են աշխատել 2017թ–ից, խնդիրը դեռ լիովին չի լուծվել», – նշեց Սարգսյանը։
Նրա խոսքով` այս երկու տարիներին վերանորոգման զգալի աշխատանքներ են կատարվել Գյումրի, Վանաձոր և Սևան քաղաքներում, իսկ եկող տարի ցանցերի լայնածավալ նորոգում կիրականացվի Կապանում։
Թե որ քաղաքներն ու գյուղերը և երբ կստանան օրական 24 (կամ 20, կամ 18 ժամ ջուր), դեռ հայտնի չէ: Երբ 2017-ին «Վեոլիա ջուրը» Երևանից հետո ստանձնել էր Հայաստանի հիմնական մասի ջրամատակարարումը, ներկայիս սակագներին նրանք համաձայնվել էին այն պայմանով, որ, ի լրումն նշված 37,5 միլիարդ դրամի, կառավարությունն էլ կներդնի ևս 200 միլիոն դոլար (քանի որ ջրամատակարարման ցանցը պատկանում է պետությանը, իսկ Վեոլիան միայն վարձակալ է): Քանի որ պետության ներդրումները դեռ «սեղանին չէին դրված», ֆրանսիացիներին չեն առաջադրել մատակարարման գրաֆիկի որևէ պարտավորություն, ինչպես ժամանակին՝ Երևանում: Որքան գումար ներդնեն, այդքան էլ ծորակներից ջուր կգա:
Հիշեցնենք, որ 2017թ–ից «Վեոլիան» կառավարում է Երևանում և այլ մարզերում ջրամատակարարման ցանցը։ Կոնցեսիոն պայմանագիրը կնքվել է 15 տարով։
«Ծննդյան վկայական» և 1000 տարվա պատմություն ունեցող գյուղը. Թեղենիքի զարգացման ծրագիրը