Տնտեսագետ Փայլակ Թադևոսյանը պարտադիր առողջապահական ապահովագրության անցնելու գաղափարն այնքան էլ չի ողջունում։ Այս մասին տնտեսագետը հայտնեց Sputnik Արմենիայի հետ զրույցում։
Թադևոսյանը մատնանշում է այն հանգամանքը, որ մի քանի ամիս առաջ կառավարությունը հայտարարել էր, թե հարկերի նվազումը կբերի գործատուների ծախսերի նվազմանը, որպեսզի գործատուները կամ հարկ վճարողները լինեն ավելի մրցունակ և հնարավորություն ունենան նոր միջոցներ ներարկել տնտեսություն: Մյուս կողմից էլ դա կարող էր ֆիզիկական անձանց տնօրինվող եկամուտն ավելացնել, ինչի վերաբերյալ վարչապետը մի քանի ամիս առաջ փաստարկ ներկայացրեց ԱԺ-ում:
«Որպես հեղափոխության արդյունքների ամրագրում՝ վարչապետը շեշտեց, որ բազմաթիվ քաղաքացիների համար տնօրինվող եկամուտը կավելանա զուտ հարկի դրույքաչափի նվազման հաշվին: Դրանից հետո բերել նոր հարկային բեռ նախատեսել ֆիզիկական անձանց կամ հարկ վճարողների համար նույնն է, ինչ այսօր մեկ բան ասենք, վաղը մեկ ուրիշ»,- նշեց Թադևոսյանը:
ՀՀ քաղաքացիներն ուզո՞ւմ են, որ առողջության պարտադիր հարկ լինի. հարցում
Թադևոսյանի կարծիքով՝ մոտակա երկու-երեք տարիների ընթացքում այն նույնիսկ չպետք է քննարկվեր, իսկ եթե նման միջոցառում էին նախատեսում, առնվազն կարելի էր հարկային բեռը նախապես չնվազեցնել:
«Ֆիզիկական անձի համար ոչ բոլոր դեպքերում է եկամտահարկի դրույքաչափերի նվազեցումը բերում տնօրինվող եկամտի ավելացման, քանի որ նոր ընդունվող աշխատողի համար այդ դրույքաչափը նախկինում բարձր է եղել, թե ցածր, արդեն նշանակություն չունի»,- նշեց Թադևոսյանը:
Տնտեսագետի դիտարկմամբ՝ այն տարածվում է հիմնականում պետական հատվածի վրա, որովհետև այնտեղ գործ ունենք ֆիքսված հաշվարկային աշխատավարձերի հետ: Նախատեսվող համակարգը, Թադևոսյանի տեղեկացմամբ, ընդամենը ծածկելու է առողջապահության ընդհանուր ծախսերի 47 տոկոսը, հետևաբար հայտարարել համապարփակ ապահովագրության մասին, որ բոլոր ապահովագրական ծախսերը հատուցվելու են և որևէ հիվանդ, ինչպես հայտարարվում է, դրսում չի մնալու, առնվազն տեղին չէ:
Կյանքի ու մահվան սահմանագծին. դիակային փոխպատվաստում. մարդիկ «այո» կասե՞ն ճիշտ պահին
Ըստ օրենսդրական նախաձեռնության` առողջության պարտադիր հարկը պետք է կազմի աշխատավարձի 4-6%–ը։
Նշենք, որ պարտադիր առողջապահական ապահովագրական փաթեթը կներառի թերապևտիկ, մանկաբույժի, ընտանեկան բժշկի ծառայությունները, լաբորատոր հետազոտությունները, օնկոլոգիական ծառայությունները, սրտի վիրահատությունները, քիմիոթերապիան։