ԵՐԵՎԱՆ, 7 դեկտեմբերի — Sputnik. Հանրապետության նախագահ Արմեն Սարգսյանն այսօր Գյումրիում այցելել է «Արեգակ» ներառական փուռ-սրճարան։ Այս մասին հայտնում է նախագահի մամուլի ծառայությունը։
«Ինձ մի հատ կոֆե կտա՞ք»,–հարցնում է նախագահն` արդեն իսկ հարազատ դարձած միջավայրում. Գյումրիում գտնվելիս նախագահը գրեթե միշտ այցելում է այս սրճարան։
Սարգսյանը փուռ-սրճարանի աշխատակիցներից Միքայելի հետ զրույցի բռնվելով` նրան ասում է, որ Ձմեռ պապիկին նամակ գրի ու իրեն տա։ Ի պատասխան Միքայելն արձագանքում է, որ Ձմեռ պապիկից միայն խաղաղություն է ուզում։
Մեկ բաժակ սուրճ ու տղաների թխած թարմ հացաբուլկեղենը նրանց ընկերակցությամբ վայելելուց հետո նախագահը հեռացել է սրճարանից։
Հիշեցնենք, որ սրճարանի աշխատակիցները հաշմանդամություն ունեցող երեխաներ են ու նրանց ծնողները, որոնք ուղիղ մեկ տարի խոհարարական հմտություններ են սովորել «Էմիլի Արեգակ» կենտրոնում: Առաջին անգամ չէ, որ նախագահն այցելում է այս սրճարան, ինչպես ինքն է սիրում ասել՝ այստեղ շատ ընկերներ ունի` Միքայելը, Գրիշան ու Հովհաննեսը։