Վերջին շրջանում հնչած հեղափոխական կոչերն ու ՍԴ-ի շուրջ տեղի ունեցող քաղաքական գործընթացներն իրավաբանների տեսանկյունից անընդունելի են, որովհետև եթե խոսքը դատավորներին փոխելու մասին է, ապա պետք է լինի միայն իրավական գործընթաց: Sputnik Արմենիայի հետ զրույցում այս մասին ասաց փաստաբան Արա Ղազարյանը։
Չհեռացող դատավորների գույքը կստուգե՞ն. նախարարը խոսել է սահմանադրական ճգնաժամի մասին
«ՍԴ-ի շուրջ փոթորիկը դադարեց Վենետիկի հանձնաժողովի կտրուկ գնահատականներից հետո, և որոշեցին վերադառնալ իրավական արահետ: Իրավաբանությունը չի սիրում ծայրահեղություններ, այլ սիրում է փոխհավասարակշռված մոտեցումներ` օրենքի գերակայության հիման վրա»,- նշեց նա:
Փաստաբանի դիտարկմամբ՝ իշխանափոխության ալիքի վրա կոչերը մի փոքր հեղափոխական բնույթ էին կրում, ինչը չաշխատեց, որովհետև դատական համակարգը չպետք է ենթարկվի հեղափոխության գաղափարին: Այդ համակարգը սիրում է կայունություն: Զարգացումներն այստեղ չեն կարող լինել բեկումնային, քանի որ արդարադատության անիվն անընդհատ պտտվում է ու եթե թեկուզ մեկ օրով կանգնի, ապա կլինի կոլապս:
Հրայր Թովմասյանն արձագանքել է Վենետիկի հանձնաժողովի նախագահի հայտարարությանը
Ղազարյանի համոզմամբ՝ իշխանությունները դա ըմբռնեցին: Ընդհանրապես, հեղափոխությունն, ըստ նրա, միշտ էլ օրենքի գերակայությունից շեղում է, այդ իսկ պատճառով ավելի լավ է գնալ իրավական գործընթացով, մանավանդ, որ դա մատնացույց են անում նաև եվրոպացի գործընկերները:
Հիշեցնենք, որ ՀՀ կառավարությունն առաջարկել է «Սահմանադրական դատարանի» և «Պաշտոնատար անձանց գործունեության ապահովման, սպասարկման և սոցիալական երաշխիքների մասին» ՀՀ օրենքներում կատարել փոփոխություններ։ Նախագծերը դեռ գտնվում են քննարկումների փուլում: