ԵՐԵՎԱՆ, 2 դեկտեմբերի – Sputnik. Ռադիկալ տրամադրված կեղծ հայրենասերի արարքը որևէ տրամաբանական շրջանակի մեջ չի տեղավորվում։ Sputnik Արմենիայի հետ զրույցում այս մասին ասաց ՀՀ ազգային ժողովի պատգամավոր Ալեքսեյ Սանդիկովը` անդրադառնալով ռուս գրող Ալեքսանդր Գրիբոյեդովի արձանը ներկելու մասին` ակտիվիստ Շահեն Հարությունյանի հրապարակմանը, որը նա արել է Facebook–ի իր էջում։
«Որպես պատգամավոր` անձամբ եմ հետևելու, որ վանդալիզմի ակտ իրականացրած անձը պատժվի օրենքի ողջ խստությամբ։ Ճիշտ նույն կերպ` մեր դիվանագիտական ալիքներով հետևելու ենք իրադարձությունների զարգացմանը Ռուսաստանի Արմավիր քաղաքում տեղի ունեցած վանդալիզմի դրսևորման դեպքի մասով»,–նշեց պատգամավորը։
Նա ավելացրեց, որ «այս սադրիչ գործողությունները» փորձում են ստվեր գցել դինամիկ զարգացող հայ–ռուսական հարաբերությունների վրա և պետք է անհապաղ կանխվեն։
Նշենք, որ քաղաքական ակտիվիստ Շահեն Հարությունյանը` ընդդիմադիր քաղաքական գործիչ Շանթ Հարությունյանի որդին, Facebook–ի իր էջում հայտարարել էր, որ կարմիրով ներկել է «Ռուսական կայսրության դեսպան, գրող Գրիբոյեդովի արձանը՝ ի պատասխան Նժդեհի հուշատախտակի ներկմանը»։
Ոստիկանությունից Sputnik Արմենիային հայտնեցին, որ Նժդեհի արձանը ներկելու փաստի առնչությամբ նյութեր են նախապատրաստվում։
ԶԼՄ–ները հայտնել էին, որ Կրասնոդարի երկրամասի Արմավիր քաղաքի դումայի պատգամավոր Ալեքսեյ Վինոգրադովը սև ներկով ներկել է հայկական եկեղեցու բակում տեղադրված Գարեգին Նժդեհի հիշատակը հավերժացնող հուշատախտակը: Ավելի ուշ Ռուսաստանում Հայաստանի դեսպանատունը վրդովմունք էր հայտնել միջադեպի կապակցությամբ։