ԵՐԵՎԱՆ, 2 դեկտեմբերի — Sputnik. ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը պահանջում է պաշտոնանկ անել «Դիլիջան» ազգային պարկի տնօրենին ու իրավապահներին մեղադրում օրենք չիմանալու համար։
«Պարո՛ն ոստիկանապետի պաշտոնակատար, ձեր ենթակաները օրենք չգիտեն»,– Facebook-ում գրել է պատգամավորը։
Զոհրաբյանը նշել է, որ երեկ` դեկտեմբերի 1-ին,«Դիլիջան» ազգային պարկի տնօրեն Սուրեն Աղաջանյանը Դիլիջանում գտնվող, իրեն պատկանող «Գետափ» ռեստորանում հրապարակավ գնդակահարել է շանը։ Իսկ քաղաքացիների ահազանգով ժամանած ոստիկաններն ասել են, թե կենդանիների հանդեպ դաժան վերաբերմունքը քրեականացնող օրենքը դեռ ուժի մեջ չի մտել ու գնացել են։
«Որպես օրենքի հեղինակ՝ տեղեկացնում եմ բոլորին, որ օրենքն արդեն գործում է, ուժի մեջ է, և քիչ առաջ պաշտոնապես դիմել եմ Ոստիկանապետի պաշտոնակատարին՝ հանձնարարել քննություն սկսել Սուրիկ Աղաջանյանի հանդեպ՝ ՀՀ Քրեական օրենսգրքի 258 հոդվածի 2-րդ մասի հատկանիշներով, որը նախատեսում է մեկից երեք տարի ազատազրկում»,– գրել է Զոհրաբյանը։
Մինչ այդ նա Facebook-ում ահազանգել էր նաև, որ երբ Աղաջանյանն իր ռեստորանում բազմաթիվ մարդկանց ներկայությամբ կրակել է շան վրա, Դիլիջանի ոստիկանության պետի տեղակալը այդ մասին ահազանգած քաղաքացիներին ասել է. «Դե, հա, իրա անասունն ա, ինչ կա դրա մեջ»։
«Մտերիմներիցս մեկն ինձ ասաց՝ աղջիկ ջան, ուշքի արի...». անկեղծ զրույց Նաիրա Զոհրաբյանի հետ
Նշենք, որ ազգային պարկի տնօրենի արձակած կրակոցից կենդանին սատկել է։ Իսկ Աղաջանյանն ու նրա մերձավոր շրջապատը կատարվածը մամուլում արդարացնում են նրանով, որ շունն ազգային պարկի տնօրենինն էր ու կատաղած էր։
«Մշուշոտ հույս ունեմ, որ իրավապահները կրակող անասունին կգտնեն». Նաիրա Զոհրաբյան