Մեր մասնակցությունը ՀԱՊԿ-ին` պայմանավորված է եղել արտաքին ակնառու սպառնալիքը չեզոքացնելու համար հավելյալ իրավաքաղաքական և ռազմաքաղաքական մեխանիզմներ ապահովելու ցանկությամբ: Եթե մեր երկրին ակնհայտորեն սպառնացող հարևանը դառնում է նույն ռազմաքաղաքական կառույցի անդամ նույնիսկ դիտորդի կարգավիճակով, ապա, բնականաբար, մեզ մոտ առաջանում են բազմաթիվ հարցեր, մասնավորապես, կապված այդ կառույցի ադեկվատ արձագանքի հետ անհրաժեշտության դեպքում: Sputnik Արմենիայի հետ զրույցում այս մասին ասաց ռազմական հարցերով փորձագետ Դավիթ Ջամալյանը։
Բիշքեկում մեկնարկեց ՀԱՊԿ գագաթնաժողովը. ինչ են քննարկելու պետությունների ղեկավարները
«Դա մեզ համար ցանկալի հեռանկար չէ: Կա տեսակետ, որ եթե Ադրբեջանը ներգրավված լինի ՀԱՊԿ-ում, հնարավոր կլինի ինչ-որ ռիսկեր կանխել, սակայն ես հեռու եմ այդ տեսակետից, քանի որ Ադրբեջանը ռազմաքաղաքական առումով ու էթնոգենետիկ կապերով սերտորեն կապված է Թուրքիայի հետ: Նրանց հեռահար շահերը նույնական են, և այդ կապվածությունն այնքան խորն է և ընդգրկուն, որ ՀԱՊԿ-ում Ադրբեջանի ներկայությամբ` թուրքական ազդեցությունն այդ երկրում ուղղակի նվազել չի կարող»,- նշում է Դավիթ Ջամալյանը:
ՀԱՊԿ–ի նիստում ԼՂ–ի հարցն ու Սիրիայում ապրող հայերի անվտանգության խնդիրն է բարձրացվել
Փորձագետի դիտարկմամբ՝ ՀԱՊԿ-ին անդամագրվելու պարագայում Ադրբեջանը շահում է, որովհետև ինչ-ինչ լծակներ կստանա ներքին գործընթացների վրա ներազդելու առումով: Դիտորդի կարգավիճակն, իհարկե, էական սահմանափակումներ է ենթադրում, բայցևայնպես, դա կլինի ինչ-որ թեկուզ փոքր հնարավորություն՝ ազդելու ՀԱՊԿ-ի քաղաքականության, կառույցի ներսում որոշումներ կայացնելու վրա: Դավիթ Ջամալյանի համոզմամբ՝ սա մեզ համար մերժելի է, ուստի պաշտոնական Երևանն այդ կապակցությամբ պետք է արտահայտի իր սկզբունքային դիրքորոշումը: