ԵՐԵՎԱՆ, 28 նոյեմբերի — Sputnik. Բազմադեղաբուժությունն ավելի շատ բնորոշ է տարեցներին, քանի որ տարիքի հետ հիվանդությունների քանակն ավելանում է, դիմադրողականությունը` նվազում։ Այս մասին Sputnik Արմենիայի հետ զրույցում ասաց ՀՀ ԱՆ ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոնի դեղերի անվտանգության դիտարկման բաժնի ղեկավար Նաիրա Ռոմանովան։
Նոյեմբերի 25-ից 29-ը աշխարհում նշվում է Դեղերի անվտանգության շաբաթը. Հայաստանը նույնպես միացել է նախաձեռնությանը։ Նախաձեռնության նպատակը հասարակության իրազեկվածության մակարդակը բարձրացնելն է։
«Բազմադեղաբուժություն է դիտարկվում չորս և ավելի դեղերի զուգահեռ կիրառումը: Ըստ հետազոտությունների` աշխարհում 75 տարեկանից բարձր անձանց 30 տոկոսը կիրառում է 6 և ավելի դեղ: Հայաստանում, ճիշտ է, չկա նման հաշվարկ, սակայն մեզ մոտ էլ ավելի շատ տարեցներն են բազմադեղաբուժության գնում»,–ասաց Ռոմանովան։
Նա հայտնեց, որ երկարատև ու լուրջ հիվանդությունների ժամանակ են մարդիկ բազամադեղաբուժության դիմում, ուստի լինում են դեպքեր, որ երեխաների շրջանում է բազմադեղաբուժություն հանդիպում ։ Աշխարհում, առհասարակ, շուրջ 1 միլիոն մարդ օրական կիրառում է 8 և ավելի դեղ։
Բազմադեղաբուժության ժամանակ դեղերի կողմնակի ազդեցություններից խուսափելու համար, ըստ մասնագետի, առաջին հերթին անհրաժեշտ է մասնագետի հետ խորհրդակցելով դեղեր կիրառել։ Ռոմանովան նշեց, որ ինքնաբուժությունը ճիշտ չէ բոլոր դեպքերում, իսկ բազմադեղաբուժության ժամանակ առավել ևս, քանի որ այս պարագայում մեծ է դեղերի փոխազդեցության վտանգը։
«Կիրառման ժամանակ ցանկացած դեղ կարող է ունենալ կողմնակի ազդեցություն (դեղի ցանկացած անցանկալի կամ չակնկալված ազդեցություն կոչվում է կողմնակի)։ Մենք ստեղծել ենք մի շարք հարթակներ, որոնց միջոցով հնարավոր է հաղորդել դեղերի կողմնակի ազդեցությունների մասին։ Եթե տեսնում ենք, որ դեղն ավելի շատ վնասում է, քան օգուտ է տալիս, շրջանառությունը դադարեցնում ենք»,–ասաց նա։
Նշենք, որ կողմնակի ազդեցությունների հաղորդման համար ՀՀ քաղաքացիները կարող են ինչպես առցանց լրացնել հայտագիրը, թեժ գծի միջոցով հայտնել այդ մասին` զանգահարելով +374 10 20 50 50, 096 22 50 50 հեռախոսահամարներով։ Բացի այդ, կա նաև Med Safety հավելվածը, որը կարելի է ներբեռնել iTunes App Store and Google Play -ից IOS կամ Android համակարգով աշխատող բջջային հեռախոսի միջոցով:
Հիշեցնենք, որ այս տարի, օրինակ, առողջապահության նախարարի 2019–ի մարտի 29-ի հրամանով դադարեցվել էր «Մեդանա Ֆարմա ԲԸ, Պոլսկոյ Օրգանիզացիի Վոյսկովոյ 57 Փ., 98-200 Սիերադզ, Լեհաստան» դեղագործական կազմակերպության արտադրության «Ակվադետրիմ ջրային լուծույթ 10 մլ» դեղի շրջանառությունը ՀՀ–ում։ Վերոհիշյալ դեղի խմբաքանակները գրանցված չէին ՀՀ–ում։
Կյանքի ու մահվան սահմանագծին. դիակային փոխպատվաստում. մարդիկ «այո» կասե՞ն ճիշտ պահին