ԵՐԵՎԱՆ, 25 նոյեմբերի – Sputnik. «Հարավկովկասյան երկաթուղի» ընկերությունը 2019 թվականի հոկտեմբերի 22-24-ի իրադարձությունների հետ կապված` ՀՀ օրենսդրությունը խախտած դեպոյի 93 աշխատողներին աշխատանքից ազատելու իր իրավունքը չի իրականացնի` համարելով, որ աշխատողների մեծամասնությունը դիտավորյալ մոլորեցվել է։ Չեն կիրառվի նաև կարգապահական տույժեր։ Այս մասին ընկերությունը հաղորդագրություն է տարածել։
Հաղորդագրության մեջ նշվում է, որ այս որոշումը կայացվել է «Հարավկովկասյան երկաթուղի» ընկերության արհմիության, Տարածքային կառավարման և ենթակառուցվածքների նախարարության, տեղական իշխանությունների ներկայացուցիչների, Գյումրու դեպոյի և երևանյան տեղամասի լոկոմոտիվային բրիգադների հետ հանդիպման ժամանակ: Հանդիպմանը ներկա են եղել նաև ՀԿԵ ձեռնարկությունների ղեկավարներն ու աշխատողները:
ՀԿԵ–ն միաժամանակ զգուշացնում է, որ կրկնակի խախտման դեպքում ընկերությունն իրավունք է վերապահում կիրառել գործող օրենսդրական նորմերը՝ ընդհուպ աշխատանքից ազատումը:
Ընկերությունը հաստատում է, որ նոյեմբերի 1-ից Հարավկովկասյան երկաթուղու բոլոր աշխատակիցների աշխատավարձերը 10%-ով բարձրանալու են:
Հիշեցնենք` Գյումրու լոկոմոտիվային դեպոյի մեքենավարները գործադուլ էին արել`պահանջելով աշխատավարձի 30 տոկոս բարձրացում։ Գործադուլի պատճառով Երևան–Գյումրի, Գյումրի–Երևան ուղղություններով բեռնափոխադրումներ և ուղևորափոխադրումներ չէին իրականացվել։ Չէր շահագործվել նաև Երևան–Թբիլիսի մարդատար գնացքը։ Գյումրիում գործադուլ հայտարարած մեքենավարների հետ հանդիպել էին Ազգային անվտանգության ծառայության աշխատակիցները։
«Գյումրու լոկոմոտիվային դեպոյի աշխատակիցների`մեքենավարների և նրանց օգնականների գործադուլն աշխատանքային օրենսդրության խախտում է, այն որակվում են որպես անհարգելի պատճառով ամբողջ աշխատանքային օրվա (հերթափոխի) ընթացքում աշխատողի` աշխատանքի չներկայանալ»,–այս առնչությամբ հայտարարել էր ՀԿԵ–ն:
Գյումրիում մեքենավարները դարձյալ դժգոհ են. ինչ են նրանց պատասխանել ՀԿԵ–ից
«ՀԿԵ» ՓԲԸ-ն հանդիսանում է «Ռուսական երկաթուղիներ» ԲԲԸ-ի դուստր ընկերություն և իրականացնում է Հայաստանի երկաթուղային համակարգի կոնցեսիոն կառավարումը: Համաձայն 2008 թ. փետրվարի 13-ին Երևանում կնքված պայմանագրի՝ կոնցեսիոն կառավարման ժամկետը կազմում է 30 տարի՝ կողմերի փոխադարձ համաձայնությամբ ևս 10 տարի երկարացման իրավունքով: