ԵՐԵՎԱՆ, 21 նոյեմբերի — Sputnik. Մաքսային կոմիտեի նախկին նախագահ Արմեն Ավետիսյանին պատկանող «Գոլդեն Փելես» հյուրանոցը դեկտեմբերի 18–ին աճուրդի կհանվի։ Այս մասին այսօր որոշում կայացվեց կառավարության նիստի ժամանակ։
«Հաշվի առնելով այն հանգամանքը, որ հյուրանոցը հնարավոր է շահագործել միայն ներսում առկա շարժական գույքի շնորհիվ, ապա կառույցն աճուրդի կհանվի գույքի հետ միասին։ Հյուրանոցային համալիրի և գույքի շուկայական արժեքի գնահատում է իրականացվել, և այս տարվա ապրիլի դրությամբ շինության շուկայական արժեքը կազմել է 7 մլրդ 214 մլն դրամ, իսկ շարժական գույքի արժեքը հունիսի դրությամբ 312 մլն դրամ է եղել»,–նշված է որոշման նախագծի մեջ։
Այսպիսով` «Գոլդեն Փելեսը» աճուրդի կհանվի 7 մլրդ 526 մլն դրամով։
Հիշեցնենք` ՀՀ կառավարության սեպտեմբերի 26–ի նիստում որոշվեց Մաքսային կոմիտեի նախկին նախագահ Արմեն Ավետիսյանին պատկանող Ծաղկաձորի «Գոլդեն Փելես» հյուրանոցն ընդունել որպես նվիրատվություն։
Նախկին պաշտոնյան նման առաջարկ էր արել այն բանից հետո, երբ ԱԱԾ–ն բացահայտել էր իրեն պատկանող երեք հյուրանոցներն անօրինական գումարներով կառուցելու փաստը։
«Գոլդեն Փելես» հյուրանոցը մինչև տարեվերջ կա՛մ կվաճառվի, կա՛մ աճուրդի կհանվի. Բաբայան
2018թ.–ի նոյեմբերին ԱԱԾ քննչական վարչությունում հարուցվել էր քրեական գործ` Մաքսային պետական կոմիտեի նախկին նախագահ Արմեն Ավետիսյանի կողմից ձեռնարկատիրական գործունեությանն ապօրինի մասնակցելու և հանցավոր ճանապարհով ստացված առանձնապես խոշոր չափերով գումարներն օրինականացնելու (փողերի լվացում) փաստով։
«Գոլդեն Փելեսով» հետաքրքրվողները շատ են. կառավարությունը դեռ մտածում է
Ըստ մեղադրանքի` Արմեն Ավետիսյանն իր երեք հյուրանոցները կառուցել է ապօրինի ձեռք բերված միջոցներով, իսկ դրանց ծագումը թաքցնելու համար ներկայացրել իբրև արտասահմանյան ներդրում։
Երևանի Ազատության պողոտայում գտնվող «Գոլդեն Փելես» հյուրանոցային համալիրի կառուցումը, օրինակ, վերագրվել է Կիպրոսի օֆշորային գոտում հիմնադրված «Ռիվերհիլ Հոլդինգս» ընկերությանը։