ԵՐԵՎԱՆ, 13 Նոյեմբեր — Sputnik. Շատ ուրախալի է, որ ՌԴ ԱԳ նախարարն արձանագրեց, որ Արցախի ժողովուրդը խնդրի լուծման հարցում դիրքորոշման արտահայտման իրավունք ունի։ Այսօր Աժ–ում կառավարության անդամների հետ հարցուպատասխանի ժամանակ այս մասին ասաց ՀՀ վարչապետ Նիկոլ Փաշինյանը` մեկնաբանելով ՌԴ ԱԳ նախարար Սերգեյ Լավրովի` հայաստանյան այցի ընթացքում Արցախի վերաբերյալ արած հայտարարությունները։
«Այստեղ հիմնական շեշտադրման իմաստն այն է, որ այո՛, Ղարաբաղի հարցն ինչպե՞ս կարող է լուծվել առանց Ղարաբաղի, առանց Ղարաբաղի ժողովրդի դիրքորոշման արտահայտման իրավունքի։ Շատ ուրախալի է, որ ՌԴ ԱԳ նախարարը դա արձանագրեց»,–ասաց ՀՀ վարչապետը։
Փաշինյանի դիտարկմամբ` արցախյան հարցի լուծման առումով ՀՀ նոր իշխանության պատկերացումներն ավելի լավ ընկալում են ստացել բանակցային պրոցեսի միջնորդների մոտ։
«Արձանագրվել է, որ մեր դիրքորոշումները կառուցողական են։ Եվ հիմա արդեն կարող ենք արձանագրել, որ ի հեճուկս ահազանգերի` բանակցային գործընթացը ոչ միայն փակուղի չի մտել, այլև աշխատանքներ են տարվում պայմաններ ստեղծելու համար, որ լինի հակամարտող բոլոր կողմերի համար լուծում գտնելուն ուղղված բանակցային մթնոլորտի միջավայր»,–ասաց Փաշինյանը։
Ինքնագրեր, լուսանկարներ և նամակներ. Երևանի ուսանողները Լավրովին ռոք աստղի նման դիմավորեցին
ՀՀ վարչապետն իր խոսքում ընդունեց, որ Հայաստանում տեղի ունեցած քաղաքական փոփոխություններից հետո որոշ մտավախություն առաջացավ, թե որքանով կառուցողական կլինի Հայաստանի նոր ղեկավարության դիրքորոշումը Արցախի հարցում։
Վերջին մեկուկես տարվա ընթացքում, Փաշինյանի խոսքով, փոխվել է այն, որ ՀՀ բոլոր գործընկերներն արձանագրել են, որ ՀՀ նոր իշխանությունը ոչ միայն մտադիր չէ բանակցային գործընթացը փակուղի մտցնել, այլև, որ Հայաստանն ասում է` կան բազմաթիվ հարցեր, առանց որոնց ճշգրտման արդյունավետ բանակցային գործընթաց տանելն արդյունավետ չէ և չի կարող լինել։
Հիշեցնենք` նոյեմբերի 11-ին ՌԴ ԱԳ նախարար Սերգեյ Լավրովը Հայաստանում հայտարարել էր, որ Ռուսաստանը որպես Մինսկի խմբի համանախագահող երկրներից մեկը, պետք է այնպես անի, որ Ղարաբաղյան հակամարտության բանակցություններն ընթանան ընդհանուր համաձայնության հողի վրա, բայց բոլորին է պարզ, որ առանց Լեռնային Ղարաբաղի ժողովրդի համաձայնության` որևէ որոշում ընդունվել չի կարող. Հայաստանն ուղղակի դրանք չի ստորագրի։