ԵՐԵՎԱՆ, 13 նոյեմբերի — Sputnik. Հայաստանի հարավում` Կապանում, գտնվող նոր օդանավակայանը կկարողանա միանգամից մի քանի օդանավ ընդունել։ Այս մասին Sputnik Արմենիային հայտնեց նախագիծը ֆինանսավորող Զանգեզուրի պղնձամոլիբդենային կոմբինատի ոչ արտադրական շինարարության դեպարտամենտի ղեկավար Աշոտ Այվազյանը։ Նրա խոսքով` շինարարական աշխատանքներն այստեղ գրեթե ավարտվել են, իսկ նավիգացիոն սարքավորումներն արդեն գնվել, մասամբ էլ` մատակարարվել։
«Թռիչքուղու աշխատանքները գրեթե ավարտվել են, մնում է միայն ազդանշանային լույսեր տեղադրել։ Սակայն դրանց համար նախատեսված լարերն արդեն կան, այնպես որ քիչ աշխատանք է մնացել», – տեղեկացրեց նա։
Երևանից Կապան կարելի է հասնել 5.5-6 ժամում։ Խորհրդային տարիներին այստեղ օդանավակայան և երկաթուղի էր կառուցվել։ 90-ականների սկզբից օդանավակայանը, ինչպես և Կապան քաղաքը, հայտնվեց ադրբեջանական ուժերի հրետակոծության տակ։ 2017 թվականին, երբ այստեղ կապիտալ վերանորոգում սկսվեց, թռիչքուղու վրա չպայթած արկ հայտնաբերեցին։ Ընթացող աշխատանքների մասին մենք արդեն գրել ենք։
Թռիչքուղին ոչ միայն կապիտալ վերանորոգել են, այլև ընդլայնել։ Երկարությամբ այն շուրջ 2 կմ է, լայնությամբ` 40 մետր։ Դրա շնորհիվ, այստեղ կկարողանան միանգամից երկու ինքնաթիռ և մեկ ուղղաթիռ վայրէջք կատարել։ 19-մետրանոց մեկ ինքնաթիռ արդեն գնվել է, բայց դեռ անգարում է պահվում Երևանում։ Օդանավն օդ բարձրացնող օդաչուները վերապատրաստում են անցնում։
Օդանավակայանի աշխատանքներին հետևում են քաղավիացիայի և ՀՀ քաղաքաշինության կոմիտեն։
Նշենք, որ Հայաստանում խորհրդային տարիներին մի քանի փոքր օդանավակայան է գործել տարբեր շրջաններում։ Դրանք փոքր–ինչ թեթևացնում էին հաղորդակցությունը Երևանի հետ։ ԽՍՀՄ փլուզումից հետո դրանց շահագործումը դադարեցվեց, բացի Լենինականի օդանավակայանից (ներկայիս` Գյումրի)։ Քննարկվում է նաև զբոսաշրջային Ջերմուկում օդանավակայանի վերակառուցման հնարավորությունը, որոշակի ժամանակ առաջ այդ մասին բանակցում էին ռուսական «Աերոպորտ Արխանգելսկ» ընկերության հետ։
Զանգեզուրի պղնձամոլիբդենային կոմբինատը Հայաստանի և Անդրկովկասի խոշորագույն հանքավայրում պղինձ և մոլիբդեն է արտահանում։ Կոմբինատի բաժնետոմսերի 75%–ի սեփականատերերը Cronimet խմբի գերմանական ընկերություններն են։