ԵՐԵՎԱՆ, 31 հոկտեմբերի – Sputnik. «Սպայկա» ընկերության 2 բեռնատարները Լարսի մաքսային անցակետում պահել են բեռի ռիսկային լինելու պատճառով։ Այս մասին հայտնում է ՀՀ էկոնոմիկայի նախարարությունը։
«Սպայկա» ընկերությունն այսօր հայտարարություն է տարածել` նշելով, որ արդեն 16 օր է` ընկերության բեռնատարները` հատուկ պահպանության պայմաններ պահանջող գյուղմթերքով, գտնվում են Վերին Լարսի անցակետում, սակայն որևէ հստակ պատասխան և որոշակիություն չկա, թե ինչ պատճառով մաքսային գործառնությունները չեն ավարտվում և չի թույլատրվում բեռի բացթողումը ՌԴ տարածք: Բեռնատարներից մեկում ՀՀ-ում արտադրված 20 տոննա բարձր որակի թանկարժեք կապույտ բորբոսով պանիր է, իսկ մյուսի մեջ՝ 18 տոննա խաղող և 1 տոննա կապույտ բորբոսով պանիր: Բեռն անցնում է մաքսային ստուգում, ինչի հետ կապված դեռևս 2019 թվականի հոկտեմբերի 14-ին բեռնափոխադրվող պանրից վերցվել են փորձանմուշներ, իսկ ընկերությունն իր հերթին մաքսային գործառնությունները արագացնելու համար մեկ օրվա ընթացքում տրամադրել է բոլոր պահանջվող և լրացուցիչ փաստաթղթերը
ՀՀ էկոնոմիկայի նախարարությունը հայտնում է, որ տեղեկացել են «Սպայկա» ընկերության` պանրով բեռնված 2 մեքենաները Լարսի մաքսային անցակետում պահելու մասին:
«Նախարարությունը կապ է հաստատել Հյուսիսկովկասյան մաքսատան պատասխանատուների հետ, որոնք տեղեկացրել են, որ մեքենային ժամանակավոր բաց չթողնման պատճառն այն է, որ անցակետի ռիսկերի կառավարման համակարգը ռիսկային է համարել բեռը` «պատժամիջոցների» ցանկով նախատեսված ապրանքներին պատկանելության տեսանկյունից: Ըստ վերջիններիս տեղեկատվության` նմուշն ուղարկվել է համապատասխան լաբորատորիա` բեռի ծագումնաբանությունը որոշելու նպատակով»,– նշված է գերատեսչության հաղորդագրության մեջ:
Հայ խոպանչիներն արտոնյալ են. Ռուսաստանը միգրանտներին արգելում է աշխատել որոշ ոլորտներում
Ըստ նախարարության` լաբորատորիայի եզրակացությունը ստանալուց հետո կընդունվի համապատասխան որոշում տվյալ բեռի հետ կապված հետագա քայլերի վերաբերյալ:
Կապույտ բորբոսով պանիրը «Սպայկա» ընկերության նոր արտադրանքն է: Ընկերությունը հայտնում է, որ անցակետում ներկայացվել է նաև անասնաբուժական սերտիֆիկատը, կապույտ բորբոսով պանրի արտադրության տեխնիկական պայմանները, արտադրության տեխնոլոգիական սխեման: Տրամադրվել են նաև ընթացիկ արտադրությունը նկարագրող տեսանյութեր, ինչպես նաև հայաստանյան և ռուսաստանյան լրատվամիջոցների ռեպորտաժները «Սպայկա» ընկերության պանրի գործարանի բացման վերաբերյալ, որին ներկա էին ՀՀ վարչապետ Նիկոլ Փաշինյանը, կառավարության անդամները, ՌԴ, ԳԴՀ արտակարգ և լիազոր դեսպանները:
Ներկրված ավտոմեքենաները կվաճառվե՞ն, թե՞ ներկրողները կմնան վարկերի տակ