ԵՐԵՎԱՆ, 30 հոկտեմբերի — Sputnik. Վերջին օրերին արցախա-ադրբեջանական հակամարտ զորքերի շփման գծում նկատվում է հակառակորդի կողմից հրադադարի պահպանման ռեժիմի խախտումների աճ:
Ինչպես տեղեկացնում են Արցախի պաշտպանական գերատեսչությունից, ադրբեջանական կողմը, կրկին ցուցաբերելով ապակառուցողական դիրքորոշում, ավելին՝ արհամարհելով Բաքվում ընթացող ԱՊՀ երկրների պաշտպանության նախարարների խորհրդի նիստը, գնում է առաջնագծում իրադրությունը արհեստականորեն լարելու ուղղությամբ՝ ավելի հաճախակի օգտագործելով դիպուկահար զինատեսակներ:
Արցախի Հանրապետության պաշտպանության նախարարությունը հայտարարում է, որ հավատարիմ է հակամարտող կողմերի միջև լարվածությունը թուլացնելու վերաբերյալ ձեռք բերված պայմանավորվածություններին, բայց հակառակորդի սադրանքների շարունակման դեպքում դիմելու է իրավիճակից բխող համարժեք գործողությունների:
Ադրբեջանի սադրանքներն անպատասխան չեն մնա. Արծրուն Հովհաննիսյան
Հիշեցնենք, որ Տավուշումերեկ գիշեր և այսօր վաղ առավոտյան հակառակորդը տարբեր տրամաչափի զենքերից կրակել է մի քանի գյուղերի և մարտական դիրքերի ուղղությամբ։ ՊՆ մամուլի խոսնակ Արծրուն Հովհաննիսյանի հավաստմամբ` կրակոցները լռել են միայն պատասխան կրակից հետո։