«Կեցցե՛ն հայերը». հայտնիներին «ուրախացրել է» ԱՄՆ Կոնգրեսի ընդունած բանաձևը

ԵՐԵՎԱՆ, 30 հոկտեմբերի — Sputnik. ԱՄՆ Կոնգրեսի ներկայացուցիչների պալատում Հայոց ցեղասպանությունը ճանաչող բանաձևի ընդունումը հույզերի տեղատարափ առաջացրեց համաշխարհային մակարդակով բազում «ինֆլյուենսերների» մոտ։

Մանոյան. «ԱՄՆ-ի բանաձևը նաև հայ համայնքի ուժի ցուցադրության արդյունքն է»

Ներկայացնում ենք Կարո Փայլանի, Ալեքսիս Օհանյանի ու Վլադիմիր Սոլովյովի սոցցանցային հրապարակումները։

Կարո Փայլան

Թուրքիայի խորհրդարանի հայազգի պատգամավոր Կարո Փայլանը գրառում է արել Twitter–ի իր էջում։

«Տասնյակ խորհրդարաններից հետո ԱՄՆ Կոնգրեսը ճանաչեց Հայոց ցեղասպանությունը: Մեր վիշտը այլ խորհրդարանների թեման է դարձել, քանի որ իմ երկիրն արդեն 105 տարի ժխտում է հայ ժողովրդի հանդեպ կատարված Մեծ եղեռնը: Միակ խորհրդարանը, որը կբուժի հայ ժողովրդի վերքը, Թուրքիայի մեջլիսն է, որի անդամն եմ ես», – գրել է նա։

​Ալեքսիս Օհանյան

Reddit կայքի և Initialized Capital վենչուրային ընկերության համահիմնադիր Ալեքսիս Օհանյանը Twitter–ում երկու հրապարակում է  արել։

Նա հրապարակել է կոնգրեսմեն Ադամ Շիֆի լուսանկարն ու գրել. «Respect» («Հարգանքներս»)։

Հիշեցնենք` բանաձևի ճանաչումից հետո դրա հեղինակ, կոնգրեսմեն Ադամ Շիֆը Twitter-ի իր էջում գրել էր, որ 19 տարի սպասել է այս պահին։

Պատմություն կերտեցինք. Քարդաշյանը` ԱՄՆ ներկայացուցիչների պալատի ընդունած բանաձևի մասին

Բացի այդ, Օհանյանը հրապարակել է ԱՄՆ–ի Կոնգրեսի լուսանկարն ու գրել. «Կարևոր նորություններ Կոլումբիա օկրուգից. մենք Հայոց ցեղասպանության ճանաչման մասին բանաձև ենք ստացել»։

Վլադիմիր Սոլովյով

Հայոց ցեղասպանությունը ճանաչող բանաձևին անդրադարձել է նաև ռուսաստանցի հայտնի լրագրող ու հաղորդավար Վլադիմիր Սոլովյովը։ Այդ թեմային է նվիրված նրա «Վեստի FM»–ի «Полный контакт с Владимиром Соловьевым»» հաղորդման հերթական թողարկումը։ 

Սոլովյովն անվանել է բանաձևի ճանաչումը սկզբունքային նշանակություն ունեցող պատմական առաջընթաց, որը չի կարելի թերագնահատել։

«Կեցցեն հայերը, նրանք հետևողականորեն պաշտպանում են հիշողությունն ու հարգանքն իրենց ու իրենց պատմության մասին։ Չեն թողնում, որ այն մոռացության մատնվի»,- ասել է նա։

Հիշեցնենք` ԱՄՆ Կոնգրեսի ներկայացուցիչների պալատում հոկտեմբերի 29-ին կայացած քվեարկության արդյունքում 405 կողմ, 11 դեմ քվեով Հայոց ցեղասպանությունը ճանաչող բանաձև է ընդունվել:

«Իրականում». Ինչու մեկ դար անց ԱՄՆ-ում Հայոց ցեղասպանության մասին բանաձև ընդունվեց

Նշենք, որ վերջին 40 տարիների ընթացքում առաջին անգամ Սպիտակ տան վարչակազմը ճնշում չի գործադրել Ներկայացուցիչների պալատի վրա Հայոց ցեղասպանության հարցում։ Ավելի վաղ բոլոր նախաձեռնությունները և բանաձևերն արգելափակվել են ու չեն հասել Ներկայացուցիչների պալատի քվեարկությանը։

Թուրքիայի արտգործնախարարն ամոթալի է անվանել ԱՄՆ ներկայացուցիչների պալատի ընդունած բանաձևը

Դա XX դարի առաջին ցեղասպանությունն էր։ Աշխարհի 25 երկիր է այս պահին այս կամ այն մակարդակով (կառավարության կամ խորհրդարանի) ճանաչել է Հայոց ցեղասպանությունը։ Եվս վեց պետություն, ներառյալ` ԱՄՆ–ն ու Մեծ Բրիտանիան, Ցեղասպանությունը մասամբ են ճանաչել` նահանգների կամ շրջանների մակարդակով։