ԵՐԵՎԱՆ, 28 հոկտեմբերի - Sputnik. Ներկայում չի ծրագրվում Փաշինյան–Ալիև հանդիպում, բայց ծրագրվում է ԱԳ նախարարների մակարդակով հանդիպում։ Այս մասին ասաց ՀՀ ԱԳ նախարար Զոհրաբ Մնացականյանը` Բուլղարիայի ԱԳ նախարար Եկատերինա Զախարիևանի հետ հանդիպման ժամանակ պատասխանելով լրագրողների հետ հարցերին։
«Իմ և Ադրբեջանի ԱԳ նախարար Էլմար Մամեդյարովի հանդիպումը կկայանա առաջիկա ամիսների ընթացքում։ Մենք ավելի շատ կենտրոնացած ենք, որ շարունակենք մեր հանդիպումներն ԱԳ նախարարների մակարդակով։ Ի դեպ, սա հիմքն է երկու երկրների ղեկավարների մակարդակով հանդիպում նախապատրաստելու համար»,–ասաց նա։
Նախարարի խոսքով` առաջիկայում Ադրբեջանի ԱԳ նախարարի հետ կայանալիք հանդիպման օրակարգը վերաբերում է թե՛ ԼՂ խնդրի խաղաղ կարգավորմանն առնչվող հարցերին, թե՛ խնդրի` խաղաղ կարգավորմանը նպաստող միջավայրին նպաստելուն։
Մնացականյանը նշեց նաև, որ Մամեդյարովի հետ հանդիպման ժամանակ կքննարկվեն նաև այն պայմանավորվածությունները, որոնք դեռևս իրականացման փուլում են։
Բուլղարիան շատ լավ հարաբերությունների մեջ է թե՛ Ադրբեջանի հետ, թե՛ Հայաստանի. Զախարիևա
«Մամեդյարովի հետ հանդիպման ժամանակ կոնկրետ թղթի վրա ձևավորված հարցերի շուրջ չենք բանակցելու, սակայն դա չի նշանակում, որ մենք չենք պահպանում մեր սկզբունքները»,–ասաց նախարարը։
Հիշեցնենք, որ վերջին անգամ սեպտեմբերի 24–ին Նյու Յորքում էր կայացել Հայաստանի և Ադրբեջանի ԱԳ նախարարներ Զոհրաբ Մնացականյանի և Էլմար Մամեդյարովի հանդիպումը: