ԵՐԵՎԱՆ, 28 հոկտեմբերի — Sputnik. ՀՀ վարչապետ Նիկոլ Փաշինյանն այսօր խորհրդարանական քննարկումների ժամանակ ներկայացրեց այն հիմնական պատճառները, որոնք հանգեցրել են 2019թ.–ի բյուջեով նախատեսված կապիտալ ծախսերի թերակատարմանը։
«Առաջինը`արդեն ասել եմ մի քանի անգամ` կոռուպցիայի դեմ պայքարն է։ Եթե նախկինում ենթադրաբար, այսպես կոչված, «ատկատները» համընդհանուր ընդունված իրողություն էին, այսօր դա իրողություն համարել չի կարելի։ Ես չեմ կարող վստահ լինել, որ այդպիսի երևույթներն իսպառ բացառված են, բայց դրանում ներգրավված պաշտոնյաները պետք է վստահ լինեն, որ այսօր, վաղը, մի ամսից` իրենց հետևից անպայման գալու են։ Որևէ մեկը թող չկասկածի, որ կարող է խուսափել պատասխանատվությունից»,–ասաց Փաշինյանը։
Երկրորդ պատճառն, ըստ վարչապետի, միջնաժամկետ ու երկարաժամկետ կապիտալ ծախսերի թերի ստանդարտներն են։
Մոտ 2 միլիարդ դրամ վերականգնվել է ՀՀ պետական բյուջե. դատախազության տվյալները
«Օրինակ`այսօր հանրությունը սոցիալական կայքերում շատ մեծ գոհունակություն է հայտնում հանրապետությունում իրականացվող շատ մեծ ճանապարհաշինական աշխատանքների որակից։ Բայց ես ուզում եմ արձանագրել, որ ես ինքս գոհ չեմ ճանապարհաշինական այն ստանդարտից, որն այսօր հանրապետությունում հաստատված է։ Ճիշտ է, մենք այսօր ի տարբերություն նախկինի` ճանապարհաշինության որակի աննախադեպ, հսկայական փոփոխություն ունենք, բայց այդ ստանդարտները բավարար չեն, և մենք պետք է դրանք բարձրացնենք։ Խոսքը վերաբերում է հարթությանն ու այլ ստանդարտներին»,– ասաց Փաշինյանը։
Խոշոր հարկատուները 64 միլիարդով ավել գումար են բյուջե վճարել. Փաշինյանը գրառում է արել
Ծախսերը, որոնք այս տարվա բյուջեով նախատեսված են, բայց չեն կատարվել` հիմնականում շինարարական լայնածավալ ծրագրեր են։ Նախատեսված ծախսերը, որոնք, ըստ էության, խնայվել են, կփոխանցվեն հաջորդ տարվա բյուջե։
Թերակատարված ծախսերի ցուցանիշ պաշտոնապես չի հրապարակվում։