ԵՐԵՎԱՆ, 28 հոկտեմբերի – Sputnik. Հոկտեմբերի 27-ի երեկոյան կապանցիները նկատել էին, որ Ողջի գետով կրկին աղտոտված ջրեր են հոսում։ Այս մասին տեղեկանում ենք «Հայկական բնապահպանական ճակատ» խմբի Facebook-ի պաշտոնական էջից։
«Աղտոտման աղբյուրը պարզելու համար բնակիչները գնացել են ԶՊՄԿ-ի (Զանգեզուրի պղնձամոլիբդենային կոմբինատ) պոչատարում դեռ հոկտեմբերի 17-ին տեղի ունեցած վթարի վայր։ Այնտեղ ամեն ինչ նորմալ է եղել, բայց պարզվել է, որ ջրի պղտոր հոսքը Ողջի գետ էր թափվում այդ հատվածում գործող փոքր ՀԷԿ-ի թունելից։ ՀԷԿ-ը որոշել էր ԶՊՄԿ-ի պոչատարի վթարի հետևանքով պոչանքով լցված իր թունելը մաքրել, որն էլ Ողջի գետի հերթական պղտորվելու պատճառ հանդիսացավ».- գրել են խմբի անդամները։
Արտակարգ իրավիճակ Սյունիքում. պոչամբարից արտահոսք է տեղի ունեցել. տեսանյութ
Բնապահպանները գրառումը եզրափակել են հռետորական հարցով` արդյո՞ք կատարված աշխատանքները համաձայնեցվել են պետական լիազոր մարմինների հետ, և ինչո՞ւ է դա արվել մթության քողի տակ։
Հիշեցնենք` հոկտեմբերի 17-ին արտակարգ իրավիճակ էր ստեղծվել Սյունիքի մարզում։
Հայաստանում կստուգվեն բոլոր 27 հանքերը, այդ թվում` «դեղին գետը». նախարար
Շրջակա միջավայրի նախարարը հայտնել էր, որ աղտոտման աղբյուրը Զանգեզուրի պղնձամոլիբդենային կոմբինատն է։
Ավելի ուշ ՀՀ ԱԻՆ նախարար Ֆելիքս Ցոլակյանն էլ նշել էր, որ վթարված խողովակը, որից աղտոտված ջուրը լցվում էր Ողջի գետ, հայտնաբերվել է, և աղտոտված նյութերի հոսքը դեպի գետ կասեցվել է։