ԵՐԵՎԱՆ, 23 հոկտեմբերի – Sputnik. ՀՀ վարչապետ Նիկոլ Փաշինյանն այսօր Մոսկվայում «Հայրենիքին մատուցած ծառայությունների համար» 1-ին աստիճանի շքանշան հանձնեց«Արարատ-73»-ի մարզիչ Նիկիտա Սիմոնյանին։
«Ինձ համար մեծ պատիվ է Նիկիտա Սիմոնյանին հանձնել այս շքանշանը։ Ես ծնվել եմ 1975 թվականին և հիշում եմ, որ մեր ընտանիքի բոլոր առիթներին, սեղանների շուրջ անպայման ինչ–որ մի պահի խոսակցությունը հասնում էր «Արարատ 73-ին և Նիկիտա Սիմոնյանին։ Ինձ համար մեծ պատիվ է ծանոթանալ այն մարդու հետ, որի անունն ուղեկցել է իմ մանկության ընթացքում»,– ասաց վարչապետը։
Փաշինյանի խոսքով` «Արարատ 73»-ը դարձել է մեր ազգային ինքնագիտակցության ու ինքնավստահության, սեփական ուժերի նկատմամբ մեր հավատի հենասյունը։
«Հայ ժողովրդի անունից շնորհակալություն եմ հայտնում հայրենիքին մատուցած ձեր ծառայությունների համար։ Մենք հպարտ ենք ձեզանով, որովհետև դուք ձեր աշխատանքով մեզ տվել եք հպարտություն։ Հույս ունեմ առաջիկայում ձեզ տեսնել Հայաստանում»,– ասաց վարչապետը։
Նիկիտա Սիմոնյանն իր հերթին նշեց, որ զգացված է այդ բարձր պարգևից։ Շնորհակալություն հայտնեց շքանշանի համար ու հիշեց Շառլ Ազնավուրին։
«Ազնավուրն ասում էր` 100 տոկոսով հայ է, 100 տոկոսով` ֆրանսիացի։ Ես էլ հարյուր տոկոսով հայ եմ, հարյուր տոկոսով` ռուսաստանցի»,– ասաց նա ու բարօրություն մաղթեց հայ ժողովրդին։
Նիկիտա Սիմոնյանը 1956 թվականի Օլիմպիական խաղերի հաղթող է, երեք անգամ ԽՍՀՄ լավագույն ռմբարկու է ճանաչվել։ 1950-ին սահմանել է առաջնության լավագույն ռմբարկուի ռեկորդ, որը պահպանվել է 35 տարի: Իսկ Մոսկվայի «Սպարտակի» համար խփած գոլերի ընդհանուր քանակով նա անգերազանցելի է մինչ օրս: «Արարատ» ֆուտբոլային ակումբի մարզիչն է եղել 1973-74 թվականներին։
Նիկիտա Սիմոնյանն ու Մարգարիտա Սիմոնյանը արժանացել են Ռուսաստանի բարձր պետական պարգևների