ԵՐԵՎԱՆ, 25 հոկտեմբերի — Sputnik. Արգենտինայում Թուրքիայի և Ադրբեջանի դեսպանները թույլ են տվել հերթական հակահայկական արտահայտությունները հանրային միջոցառման ժամանակ։ Այս մասին հաղորդում է Արգենտինայի հայ համայնքի Diario Armenia պարբերականը։
«Կովկասի և Կենտրոնական Ասիայի տարածաշրջան» խորագրով միջոցառումը կազմակերպել է Քիլմես քաղաքի համալսարանը, որը տեղի է ունեցել Արգենտինայի խորհրդարանում։
Դրան մասնակցել են Արգենտինայում Թուրքիայի, Ադրբեջանի և Վրաստանի գործող դեսպանները, ինչպես նաև Թուրքիայում և Ադրբեջանում Արգենտինայի նախկին դեսպանները։ Վրացի դեսպան Իրակլի Քուրաշվիլին չեզոք է պահել իրեն, իսկ մնացած հավաքվածները մի շարք հակահայկական հայտարարություններ են արել։
«Իմ սիրտը հայի է». օտար կանայք, որոնք հայ որբերին մայրեր դարձան. մաս 1–ին
Այսպես, Ադրբեջանի դեսպան Ռաշադ Ասլանովը հայտարարել է, որ Հայաստանը վտանգ է ներկայացնում տարածաշրջանի կայունության համար։ Թեման զարգացրել է Ադրբեջանում Արգենտինայի նախկին դեսպան Կառլոս Ռիվան` հայտարարելով, որ Արգենտինան կողմ է հակամարտության խաղաղ լուծմանը տարածքային ամբողջականության սկզբունքի հիման վրա։ Միաժամանակ նա չի մոռացել շեշտել, որ հայտնում է իր անձնական կարծիքը (ո՛չ Արգենտինայի ղեկավարությունը, ո՛չ հանրապետության ԱԳՆ–ն նման հայտարարություններ չեն արել` խմբ.)։
Իր հերթին Թուրքիայում Արգենտինայի նախկին դեսպան Խուլիան Տետամանտին հայտարարել է, որ հայկական հարցը «երկու երկրների հարաբերությունների զարգացման ճանապարհին առկա փորձաքարերից է»։
Ընդարձակ ելույթ է ունեցել Արգենտինայում Թուրքիայի դեսպան Վուրալ Ալթայը։ Սկզբում նա չի մոռացել հիշատակել, որ Թուրքիան աջակցում է Վրաստանի և Ադրբեջանի տարածքային ամբողջականությանը։ Միաժամանակ նա մոռացել է նշել, որ Թուրքիան աջակցում է Կիպրոսի և Սերբիայի տարածքներում անօրինական կազմավորումներին։
Բաքվի հերթական հիստերիան Զատուլինին չի զարմացրել. վաղուց գիտեր, որ ադեկվատ չեն
Այնուհետև նա արտահայտվել է հայկական հարցի մասին։ Նրա կարծիքով` Հայաստանն օգտագործում է Հայոց ցեղասպանության հարցը քաղաքական շահարկումների և Թուրքիայի վրա ճնշում գործադրելու համար։ Այնուհետև Ալթայն անդրադարձել է Արգենտինայի հայ համայնքին։ Այստեղ նա վերջնականապես կորցրել է դիվանագիտական զսպվածությունը և անցում կատարել բոլորին լավ ծանոթ օսմանյան տրամաբանությանը` «նրանք մեզ խանգարում են, ուրեմն չպետք է լինեն»։
«Բոլորին հայտնի է, որ Արգենտինայում ապրում է մեծությամբ չորրորդ հայ համայնքը` Ռուսաստանից, ԱՄՆ–ից և Ֆրանսիայից հետո։ Հայ համայնքը մինչև հիմա շատ ակտիվ է։ Նրանք շարունակում են արգելք մնալ մեր երկկողմ հարաբերությունների համար», – հայտարարել է դիվանագետը։
Նա հավելել է, որ Թուրքիան բացել է իր արխիվների բոլոր փաստաթղթերը, որոնք վերաբերել են Օսմանյան կայսրության վերջին տարիներին և պատրաստ է քննարկումների, բայց Հայաստանն «ի վիճակի չէ ընդունել ուրիշ տեսակետ»։
Միաժամանակ, Ալթայը չի հիշատակել, որ Թուրքիայում արգելված են ցեղասպանության մասին ցանկացած քննարկումներ, ընդ որում` ոչ միայն հայերի, այլ նաև հույների, ասորիների և եզդիների ճակատագրի մասին, որոնք նույնպես զանգվածաբար ոչնչացվել են թուրքական կառավարության հրամանով։ Նման հայտարարությունները համարվում են քրեական հանցագործություն և վիրավորում են թուրքերին։
Նշենք, որ Արգենտինայի խորհրդարանում միջոցառումը տեղի է ունեցել մեկ ամիս առաջ։ Խորհրդարանը հաղորդագրություն է հրապարակել այդ մասին, բայց բաց է թողել բոլոր հակահայկական արտահայտությունները։ Diario Armenia–ն միայն մեկ ամիս անց է հաղորդել, թե ինչի մասին են խոսել համաժողովում։
Հերոս և կրկնակի փախստական. ինչպես է Հրանտ Ավագյանը կռվել Գերմանիայում
Իր հերթին Արգենտինայի Հայկական ազգային խորհրդի նախագահ Նիկոլաս Սաբունչյանը հայտարարել է, որ նամակ է ուղարկել UNQ ղեկավարությանը` դժգոհություն հայտնելով այդ արտահայտությունների վերաբերյալ։
Նշենք, որ Սաբունչյանը նրանցից է, ով թուրք դեսպանի տրամաբանությամբ «խոչընդոտում է հարաբերությունները»։ 2018թ–ի մարտին նաև նրա ջանքերով Արգենտինայի երկու համալսարաններ չեղյալ են հայտարարել 1915թ–ի մասին համաժողովները, որոնք պետք է տեղի ունենային Անկարայի համալսարանի հետ` Turkish Airlines–ի ֆինանսական աջակցությամբ։ Արդյունքում համաժողովը տեղի է ունեցել Արգենտինայի Իսլմական կենտրոնում։