ԵՐԵՎԱՆ, 23 հոկտեմբերի — Sputnik. ՊԵԿ նախկին նախագահ, ֆինանսների նախկին նախարար Գագիկ Խաչատրյանը կմնա կալանքի տակ, թե ոչ, հայտնի կլինի վաղը, ժամը 12–ին։ Այս մասին լրագրողների հետ զրույցում ասաց Խաչատրյանի պաշտպան Երեմ Սարգսյանը։
«Երևան քաղաքի ընդհանուր իրավասության դատարանն ավարտեց Խաչատրյանի խափանման միջոցի քննության հարցը և իր որոշումը կհայտնի վաղը։ Ի դեպ, մեղադրող կողմն ասում է, որ ազատության մեջ գտնվելու դեպքում Խաչատրյանը կարող է խոչընդոտել նախաքննությունը»,–ասաց նա։
Պաշտպանի խոսքով` իրենք հակափաստարկներ ունեն մեղադրյալ կողմի ասածի վերաբերյալ. Խաչատրյանը ողնաշարի վիրահատությունից հետո Գերմանիայում էր գտնվում բուժման նպատակով, սակայն քննիչի մեկ զանգով նա վերադարձել է Հայաստան։
Նա տեղեկացրեց, որ իրենք Խաչատրյանին գրավի դիմաց ազատ արձակելու միջնորդություն են ներկայացրել, սակայն հաշվի առնելով գործի ընթացքը` շատ հույսեր չեն կապում դատարանի հետ։
Սարգսյանը նշեց, որ այժմ Խաչատրյանը բուժման կարիք ունի, քանի որ նրա բժիշկը հայտնել է, որ եթե մեկ շաբաթով Խաչատրյանը չվերադառնա Գերմանիա, հետո կրկնակի վիրահատության կարիք է լինելու։ Նա հայտնեց նաև, որ երբ պաշտպանական խումբը Խաչատրյանի խափանման միջոց կալանքը փոխելու միջնորդություն էր ներկայացրել, նրա առողջական վիճակը ստուգելու համար դատարանը կոնսիլիում էր հրավիրվել։ Սակայն, ըստ պաշտպանի, չնայած կոնսիլիումի պատասխանը հուլիսին պատրաստ է եղել, միայն սեպտեմբերին են տվել քննչական մարմնին։
«Այսինքն` եզրակացությունն ուղարկվել է դատարան այն ժամանակ, երբ Խաչատրյանին արդեն կալանավորել էին։ Սակայն եզրակացության մեջ էլ նշված է եղել, որ նա բուժման կարիք ունի։ Խնդիրն այն է, որ Խաչատրյանի արած ցանկացած շարժում կարող է լուրջ խնդիրներ առաջացնել նրա մոտ»,–ասաց նա։
Սարգսյանը հայտնեց նաև, որ Գագիկ Խաչատրյանի եղբորորդու՝ Կարեն Խաչատրյանի կալանավորման ժամկետը 2 ամսով երկարացնելու ԱԱԾ միջնորդությունը դատարանը բավարարեց մասնակի. Կարեն Խաչատրյանը մեկ ամսով էլ կմնա կալանքի տակ։
Գագիկ Խաչատրյանին հիվանդանոցից տեղափոխել են կալանավայր
Խուզարկություններ էին կատարվել նաև Գագիկ Խաչատրյանի հետ փոխկապակցված անձանց առանձնատներում և բնակարաններում, այդ թվում Խաչատրյանի եղբորորդու` Կարեն Խաչատրյանի տանը։ Նա Խաչատրյանի ղեկավարման տարիներին ևս պաշտոնավարել է ՊԵԿ–ում:
Կալանավորվել է տրանսպորտի և կապի նախկին նախարարը. ՔԿ
Գագիկ Խաչատրյանին մեղադրանք է առաջադրվել ՀՀ քրեական օրենսգրքի 38-179 3-րդ մասի 1-ին կետով (առանձնապես խոշոր չափերի վատնում կազմակերպելը): Քրեական գործով պետությանը պատճառված 800 միլիոն դրամի վնասը վերականգնվել է:
Ինչու է Արա Վարդանյանը կրկին կալանավորվել. ԱԱԾ–ի հայտարարությունը