ԵՐԵՎԱՆ, 22 հոկտեմբերի — Sputnik. ԱԻՆ Փրկարար ծառայության տնօրենի տեղակալ, փ/ծ գեներալ-մայոր Վրեժ Գաբրիելյանը նշանակվել է Փրկարար ծառայության տնօրենի ժամանակավոր պաշտոնակատար։
Այս մասին ասել է ԱԻ նախարար Ֆելիքս Ցոլակյանը ԱԻՆ ղեկավար կազմի հետ խորհրդակցության ժամանակ, տեղեկացնում է ԱԻՆ մամուլի ծառայությունից։
Ինչպես արդեն տեղեկացրել էինք, այսօր ՀՀ վարչապետ Նիկոլ Փաշինյանի որոշմամբ Արտակ Նահապետյանն ազատվել է Փրկարար ծառայության տնօրենի պաշտոնից:
Ֆելիքս Ցոլակյանը Փրկարար ծառայության նախկին տնօրենին հաջողություններ մաղթեց հետագա գործունեության մեջ:
Խորհրդակցության ընթացքում քննարկվել են նաև ԱԻ նախարարության գործունեության վերաբերյալ կազմակերպական բնույթի հարցեր:
Գեներալ–մայոր Վրեժ Գաբրիելյանը ծնվել է Երևանում, 1952թ–ին։ Ավարտել է Երևանի Խ. Աբովյանի անվան մանկավարժական ինստիտուտիպատմաաշխարհագրական ֆակուլտետը։
Սովորել է ԽՍՀՄՆԳՆ Վոլգոգրադի բարձրագույն քննչական դպրոցում։ 1996թ.–ից տարբեր պաշտոններ է զբաղեցրել ԱԻ ոլորտում։ 2006թ.–ից ՀՀ տարածքային կառավարման նախարարության Հայաստանի փրկարար ծառայության տնօրենի տեղակալն է։