ԵՐԵՎԱՆ, 22 հոկտեմբերի - Sputnik. ՀՀ ԱԺ աշխատակազմի ղեկավարի նախկին տեղակալ Արսեն Բաբայանի նկատմամբ քրեական գործ չէր կարող հարուցվել։ Sputnik Արմենիայի հետ զրույցում այս մասին ասաց Բաբայանի շահերի պաշտպան Լուսինե Մարտիրոսյանը։
«Այն ենթադրյալ արարքը, որն այս պահի դրությամբ որպես կասկածանք վերագրվում է Արսեն Բաբայանին, ի սկզբանե, քրեական գործի հարուցման պահի դրությամբ, չէր կարող հարուցվել, քանի որ ընդունված է եղել համաներման օրենքը»,– ասաց Մարտիրոսյանը։
Նրա խոսքով` Արսեն Բաբայանի ձերբակալության գործընթացում խախտվել է նաև դատավարական իրավունքը։
«Ինչպե՞ս կարող է անձի նկատմամբ հարկադրական միջոց կիրառվել, եթե անձը քրեական պատասխանատվության ենթակա չէ»,– ասաց փաստաբանը։
Փաստաբանի համոզմամբ, Արսեն Բաբայանի ձերբակալությունն ապօրինի է։ Լուսինե Մարտիրոսյանն արդեն բողոքարկել է Բաբայանին ձերբակալելու մասին` քննիչի որոշումը։
Ձերբակալվել է ԱԺ աշխատակազմի ղեկավարի նախկին տեղակալը. ինչ կապ ունի Գագիկ Հարությունյանը
Հիշեցնենք, որ երեկ ` հոկտեմբերի 21-ի երեկոյան, պաշտոնեական կեղծիք կատարելու կասկածանքով ձերբակալվել էր ՀՀ ԱԺ աշխատակազմի ղեկավարի նախկին տեղակալ Արսեն Բաբայանը։ Հատուկ քննչական ծառայության պաշտոնական հիմնավորման համաձայն, պաշտոնական անձինք, որոնց թվում և Բաբայանը, ՀՀ սահմանադրական դատարանի նախկին նախագահ Գագիկ Հարությունյանի` լիազորությունները վայր դնելու գործընթացում կատարել են պաշտոնեական կեղծիքներ։ Պաշտոնատար անձինք այդ քայլին դիմել են խմբային շահերից ելնելով, անձամբ, ինչպես նաև պաշտոնատար անձ չհանդիսացող աշխատակիցների միջոցով։