ԵՐԵՎԱՆ, 22 հոկտեմբերի — Sputnik.Հայաստանում ներդրումները ոչ թե ավելանում, այլ պակասում են։ Այս մասին ԱԺ–ում լրագրողների հետ զրույցում ասաց «Բարգավաճ Հայաստան» կուսակցության նախագահ Գագիկ Ծառուկյանը։
«Հեղափոխությունը որ եղավ, բոլորը մտածում էին` առավոտից իրիկուն աշխարհի հայությունը գալու է, ներդրման համար հերթ են կանգնելու, կոռուպցիան վերանալու է։ Բայց այսօր 70 տոկոս ներդրում չի կատարվում։ Նախ` պետք է հասկանան, թե ներդրման համար ինչ է պետք։ Ոչ թե միայն դատարկ խոսքեր, այլ լիարժեք օրենքներ պետք է ընդունվեն, պայմաններ ընդունվեն, մարդուն հնարավորություն, արտոնություն, առավելություն տրվի։ Ոչ թե ինչ–որ մի ծանոթի, որ ինչ–որ մի թուղթ է բերել, ասեն` լավ, իրեն հարկերից ազատենք,– ասաց Ծառուկյանը։
Նրա խոսքով` ներդրողը Հայաստանում պետք է իրեն ապահով ու վստահ զգա, այլապես երկիր կգնա։
Ավետիսյան․ «Հայաստանում ներդրումային ռիսկը չի նվազել»
Այս տեսակետից Գագիկ Ծառուկյանը կարևորում է Հայաստանում օրենսդրական փոփոխությունների իրականացումը, բիզնեսի ու ներդրողների համար «Մեկ պատուհանի» ներդրումը։ Ներկա պայմաններում, ըստ Ծառուկյանի, Հայաստանում պետական համակարգի անկատարության պատճառով ներդրումները այնքան կարող են ձգձգվել, որ ներդրողը գերադասի իր բիզնեսը որևէ այլ երկիր տանել։
«Ուզում ենք տնտեսվարողներին օգնել, ոչ թե տուգանքախեղդ անել». Գեորգի Ավետիսյան