ԵՐԵՎԱՆ, 21 հոկտեմբերի — Sputnik. «Էլեկտրոնային հաղորդակցության մասին» օրենքի համաձայն՝ օպերատորները պարտավոր են իրենց հաճախորդների օգտագործած ծառայությունների տեսակի, վայրի, նպատակի և հաճախորդի անձնական տվյալների վերաբերյալ տեղեկությունները պահել գաղտնի: Այս մասին հայտարարություն է տարածել ՀՀ հանրային ծառայությունները կարգավորող հանձնաժողովը` անդրադառնալով վերջին օրերին սոցիալական ցանցերում և ԶԼՄ-ներում քննարկվող «Էլեկտրոնային հաղորդակցության ոլորտում կարգավորվող անձանց կողմից մատուցվող ինտերնետ հասանելիության ծառայությունների վերաբերյալ արխիվների պահպանման ստանդարտներ սահմանելու մասին» որոշման նախագիծը։
Ավելի վաղ մեդիափորձագետ Սամվել Մարտիրոսյանը Facebook-ի իր էջում ահազանգել էր, որ առանց հանրային քննարկման, փորձ է արվում ինտերնետային ոլորտում վերահսկողության մեխանիզմ ներդնել։
«Նշված տեղեկությունները կարող են բացահայտվել բացառապես օրենքով սահմանված դեպքերում և կարգով: Նախագծի առնչությամբ հնչում են իրականությանը չհամապատասխանող մի շարք մտահոգություններ և կարծիքներ»,–նշված է ՀԾԿՀ–ի հաղորդագրության մեջ։
Նշվում է նաև, որ խնդրի կարգավորման անհրաժեշտությունը պայմանավորված է ինտերնետ հասանելիության ծառայություններ մատուցող անձանց կողմից համապատասխան տեղեկությունների պահպանման համար։
Տարընկալումներից խուսափելու նպատակով` հանձնաժողովը հայտնում է, որ ինտերնետ ծառայություններ մատուցող անձինք ինտերնետային բովանդակության (կոնտենտի) պահպանման որևէ իրավասություն չունեն։ Ավելին, օրենքով հանձնաժողովին վերապահված չէ կոնտենտի հետ կապված որևէ կարգավորիչ գործառույթ (այդ թվում՝ վերահսկում, խմբագրում, պահպանում):
Հանձնաժողովը հայտնում է նաև, որ իրենք` որպես կոլեգիալ ինքնավար մարմին, բոլոր որոշումներն ընդունում են դռնբաց նիստերի միջոցով՝ նախապես քննարկելով բոլոր շահագրգիռ կողմերի հետ: Նորմատիվ կարգավորումների ընդունման դեպքում նշվածին գումարվում են հանրային լայն քննարկումներ, որոնք հաջորդում են ակտի անմիջական հասցեատերերի հետ քննարկումներին:
«Խնդրո առարկա նախագիծը ներկայացվել է ավելի քան 170 ինտերնետ ծառայություններ մատուցող անձանց (օպերատորների), ինչպես նաև ՀՀ բարձր տեխնոլոգիական արդյունաբերության նախարարության և ՀՀ ԱԱԾ քննարկմանը։ Վերջիններիս կարծիքները ստանալուց հետո լրամշակված նախագիծն անցնելու է առավել լայն հանրային քննարկման փուլ»,– նշված է հաղորդագրության մեջ։
Հանձնաժողովը վստահեցնում է, որ նախագծի ոչ թափանցիկ՝ «ծածուկ» քննարկումների և հնարավոր ընդունման վերաբերյալ պնդումները չեն համապատասխանում իրականությանը։
Պատերազմ վիրտուալ տիրույթում. ինչպե՞ս Փաշինյանի կայքը հայտնվեց ադրբեջանցիների թիրախում
Հիշեցնենք` Սամվել Մարտիրոսյանը գրել էր, որ հարցն անհապաղ պետք է քննարկվի Ինտերնետի կառավարման խորհրդում։ Մարտիրոսյանի խոսքով` խնդիրը բուն թեման չէ, այլ այն, որ դա արվում է առանց հանրային քննարկումների։ Նա նշել էր, որ Ինտերնետի կառավարման խորհրդի անդամ է, և վստահեցնում է, որ «թեման խորհուրդ չի մտել, անմիջապես գնացել է պրովայդերներին»։
Որոնողական համակարգերը «պայթե՞լ են». քանի՞ միլիոն է բերել WCIT-2019–ը Հայաստանին