ԵՐԵՎԱՆ, 17 հոկտեմբերի — Sputnik. Սյունիքի մարզում աղտոտված ջրերի արտահոսքը տեղի է ունեցել Զանգեզուրի պղնձամոլիբդենային կոմբինատից դեպի պոչամբար գնացող խողովակաշարից։ Այսօր կառավարության նիստից հետո լրագրողներին հայտնեց ՀՀ շրջակա միջավայրի նախարար Էրիկ Գրիգորյանը` հերքելով տարածված լուրերը, թե արտահոսքը տեղի է ունեցել պոչամբարից։
«Քաջարանից այդ խողովակաշարը տասնյակ կիլոմետրեր գնում է ու հասնում մինչև Արծվանիկի պոչամբար։ Եվ այդ խողովակաշարի վրա միգուցե ինչ–որ ընթացիկ վերանորոգումներ իրականացվում են, բայց նաև գիտենք, որ նմանատիպ վթարներ պարբերաբար լինում են»,– ասաց նախարարը։
Գրիգորյանի խոսքով` այս խողովակաշարը կառուցվել է խորհրդային տարիներին։ Զանգեզուրի պղնձամոլիբդենային կոմբինատը թեև պարտավորություն ունի վերազինումներ անելու, բայց, նախարարի համոզմամբ, տարիներ շարունակ գերադասել է բնապահպանական ֆիկտիվ տուգանքներ վճարել, քան վերազինման վրա շատ ավելի մեծ գումարներ ծախսել։
Թե ինչ վնաս է հասցրել նոր, խոշոր վթարը շրջակա միջավայրին ու մարդկանց առողջությանը, նախարարի խոսքով, առաջիկայում իրենց եզրակացությունները կներկայացնեն այս պահին տեղում աշխատող բնապահպանական ու առողջապահական տեսչական մարմինները։
Չենք կարող բնությունը կամ պետության վարկանիշը ռիսկի տակ դնել. Ալեն Սիմոնյանը` Ամուլսարի մասին
«Իրականում բնապահպանական վնասի գործող կարգավորումները, որոնք սահմանվում են ջրային ռեսուրսներին հասցված վնասների մասին կառավարության որոշմամբ, ծիծաղելի ցածր են»,– ասաց Գրիգորյանը` հավելելով, որ նախարարությունն այժմ աշխատում է նոր սակագներ սահմանելու վրա։
Հիշեցնենք` այսօր առավոտյան ԱԻ նախարարությունն ահազանգ էր ստացել, որ Սյունիքի մարզում հանքարդյունաբերական պոչանքներով աղտոտված ջրերը հոսում են Ողջի գետը։
Դիլիջանը` իր բնությամբ և հուշարձաններով. նիրվանա պարգևող ֆոտոշարք