ԵՐԵՎԱՆ, 17 հոկտեմբերի — Sputnik. Գյումրու «Բարեկամություն» այգին գեղատեսիլ պուրակի կվերածվի` հանգստյան գոտիով, սրճարանով, կարուսելներով: Ծրագիրը կյանքի կկոչվի տարբեր բարերարների ֆինանսական աջակցությամբ:
Փրկում են կյանքեր` առանց զենքի և վախի. «Ավրորայի» հերոսների անհավանական պատմությունները
«Վերջապես մենք գտանք ճիշտ ծրագիր, որն անչափ կարևոր է գյումրեցիների համար։ Այն կդառնա նաև զարգացման ծրագիր՝ խթանելով զբոսաշրջության զարգացմանը: Ուրախ ենք, որ հատկապես գյումրեցիները կարևորեցին այս ծրագիրը: Այն համախմբեց շատերին, ու իսկապես սա ընկերության ու բարեկամության այգի է լինելու»,-լրագրողների հետ ճեպազրույցի ժամանակ նշեց հայազգի հայտնի գործարար Ռուբեն Վարդանյանը։
Նշենք, որ այգին նախատեսվում է բացել 2022 թվականի թվականին: Այն լինելու է տարածաշրջանում եզակի: Մինչ ծրագրի մեկնարկը Գյումրու «Բարեկամություն» այգին «մաքրվել» է այնտեղ տեղադրված տնակներից: Այգու ճարտարապետն է Սևակ Պետրոսյանը (ԱՄՆ):
«Ուզում ենք 2 տարվա ընթացքում կառուցել այգին: Շինարարությունը կսկսվի 2020 թվականի գարնանը, բայց դեռ շատ հարցեր կան ենթակառուցվածքների հետ կապված»,-նշեց Ռուբեն Վարդանյանը՝ չցանկանալով խոսել ծրագրի արժեքի մասին: Նա նշեց միայն, որ 10 եզակի ատրակցիոն արդեն նվիրաբերվել է IDeA հիմնադրամին:
Ծրագիրն իրականացվում է «Հայաստանի զարգացման նախաձեռնություններ» (IDeA) հիմնադրամի՝ Գյումրու զարգացման ծրագրի շրջանակում: Այգու վերակառուցման նախագիծը նպատակ ունի զարգացնել քաղաքի ենթակառուցվածքները եւ արտացոլել բարեկամության ու երախտագիտության խորհուրդը:
Հավելենք, որ ի նշան երախտագիտության` Գյումրիում երեխաները հյուրերին ու ծրագրի մասնակիցներին բաժանեցին Գյումրու խորհրդանիշ խաղերից մեկը՝ հոլը, որի վրա երեք լեզուներով՝ հայերն, ռուսերեն և անգլերեն` գրված էր «Բարեկամություն» բառից մեկ տառ: