ԵՐԵՎԱՆ, 14 հոկտեմբերի – Sputnik. Սահմանադրական դատարանում քիչ առաջ ավարտվեց Հրայր Թովմասյանի պաշտոնանկության հարցով աշխատակարգային նիստը։ Գրեթե մի ամբողջ աշխատանքային օր տևած քննարկումից հետո ՍԴ–ն որոշեց մերժել ԱԺ դիմումը։
ՍԴ աշխատակազմի ղեկավար Էդգար Ղազարյանը Sputnik Արմենիային հայտնեց, որ աշխատակարգային նիստում որոշվել է մերժել «Ազգային ժողովի դիմումի հիման վրա՝ Սահմանադրական դատարանի դատավոր Հրայր Թովմասյանի լիազորությունները դադարեցնելու վերաբերյալ» գործի քննությունը։
Հիշեցնենք` ԱԺ դիմումը ՍԴ մուտք էր արվել երկուշաբթի` հոկտեմբերի 7-ին։ Այն վարույթ ընդունելու կամ մերժելու համար դատարանը 7 օր ժամանակ ուներ։ Վերջնաժամկետը լրանում էր այսօր` հոկտեմբերի 14-ին։
Հոկտեմբերի 3-ին ԱԺ–ն ընդունել էր «Իմ քայլը» խմբակցության նախագիծը` Սահմանադրական դատարանի անդամ Հրայր Թովմասյանի լիազորությունները դադարեցնելու հարցով ՍԴ դիմում ներկայացնելու մասին։
Դիմումում 4 հիմք է ներկայացված Թովմասյանի պաշտոնանկության համար։
Նշվում է, որ նա իրավունք չուներ մասնակցելու Ռոբերտ Քոչարյանի գործով ՍԴ վարույթին, քանի որ փոխկապակցված է ՀՀԿ–ի, ՀՀԿ նախագահ Սերժ Սարգսյանի ու Քոչարյանի հետ։
Բաբայան. «Թովմասյանի լիազորությունները դադարեցնելը քաղաքական դրդապատճառներ ունի»
Հրայր Թովմասյանը նաև Քոչարյանի պաշտպան Արամ Օրբելյանի կնքահայրն է։ Նա նախկինում մարտի 1–ի գործով դատավարությունների վերաբերյալ հրապարակային կարծիք է արտահայտել, մասնակցել քրգործի վարույթին, ինչը կողմնակալ վերաբերմունքի հիմքեր է տալիս։ Իսկ չորրորդ պատճառն այն է, որ բոլոր հանգամանքներն անտեսվել են Թովմասյանի կողմից ու նա չի հայտնել նիստին իր մասնակցության անհնարինության մասին։
«Սատանայի փաստաբան» Հրայր Թովմասյանը գնալու է Սերժ Սարգսյանի հետևից. Ալեն Սիմոնյան