ԵՐԵՎԱՆ, 10 հոկտեմբերի — Sputnik. Հայկական անօդաչու թռչող սարքերը կարող են անդադար թռչել մինչև չորս ժամ և կրել 15–կիլոգրամանոց մարտագլխիկ։ Sputnik Արմենիայի թղթակցի հետ զրույցում այս մասին ասաց Davaro անօդաչու թռչող սարքեր մշակող ընկերության տնօրեն Դավիթ Գալոյանը։
Այժմ շարունակվում են նոր մոդելների մշակումները, ինչպես նաև դրանց փորձարկումները զորավարժարաններում։ Դրոնների շարքում մարտական մոդելներ են` մինչև 150 կիլոմետր խոցման շառավղով։
«Սրանք կամիկաձե դրոններ են, որոնց մարտագլխիկը կշռում է 15 կգ։ Կան նաև ռմբակոծիչ դրոններ, բայց դրանց մարտական ծանրաբեռնվածությունն ավելի քիչ է», – հավելեց Գալոյանը։
Մոդելի կապի ուղիները պաշտպանված են հատուկ տեխնոլոգիայով, որի օգնությամբ անօդաչու սարքերը կարող են հրամաններ ուղարկել նույնիսկ մեծ հեռավորությունից։
Գալոյանի խոսքով` հակառակորդի բանակը ժամանակակից թանկարժեք տեխնիկա է գնում, իսկ հայկական կողմը շեշտը դրել է հեշտ կառավարելի և համեմատաբար էժան մոդելների քանակի վրա։
«Բայց աստիճանաբար մենք ավելի բարդ ու ճշգրիտ ենք դարձնելու դրանք», – ասաց նա։
Հայաստանը կարողանում է նվիրել. ինչպես են հնդիկները ArMath–ի օգնությամբ ինժեներիա սովորելու
Նոր դրոնները ներկայացվել էին Երևանում DigiTec 2019 տեխնոլոգիական ցուցահանդեսի շրջանակում։ Վերջին 10 տարիների ընթացքում ցուցահանդեսի այցելուների քանակը հասել է ավելի քան 80000-ի։ Յուրաքանչյուր տարի ցուցահանդեսին մասնակցում են ավելի քան 120 տեղական և արտասահմանյան ընկերություններ։ Միջոցառումն այս տարի կազմակերպվեց 15-րդ անգամ։ Ցուցահանդեսն ունի թեմատիկ բաժիններ` կոմպլեքս ինժեներական լուծումներ, ՏՏ սարքավորումներ և համակարգեր, ծրագրային և վեբ լուծումներ, կիբեռանվտանգություն, հեռահաղորդակցության և ցանցային լուծումներ, բջջային տեխնոլոգիաներ և հավելվածներ, դիզայն և անիմացիա, խաղային տեխնոլոգիաներ և մուլտիմեդիա, տեխնոլոգիական լուծումներ բիզնեսի համար, տեխնոլոգիական կրթություն։
Դստեր արցունքները ստիպել են ստեղծել ստարտափը. PicsArt–ի ստեղծման հուզիչ պատմությունը