ԵՐԵՎԱՆ, 10 հոկտեմբերի — Sputnik. «Էրեբունի–Երևանի» տոնակատարություններն այս տարի ապակենտրոնացած բնույթ կկրեն, միաժամանակ կանցկացվեն քաղաքի բոլոր վարչական շրջաններում։ Այս մասին հոկտեմբերի 10-ին լրագրողներին հայտնեց փոխքաղաքապետ Տիգրան Վիրաբյանը։
Այս տարի իշխանությունը որոշել է հրաժարվել Հանրապետության հրապարակում ավանդաբար անցկացվող համերգից. հիմնական միջոցառումները կկայանան Սարյան փողոցում։ Բոլոր վարչական շրջաններում համերգներ և միջոցառումներ են նախատեսված, օրինակ` Դավիթաշենում ջազ, Նոր Նորքում` էլեկտրոնային երաժշտության, Նուբարաշենում` ռոք համերգ կանցկացվի։
«Մեզ համար քաղաքի բոլոր բնակիչները հավասար են անկախ նրանից, թե նրանք Սարյան փողոցում են ապրում, թե Նուբարաշեն վարչական շրջանում», – ասաց Վիրաբյանը։
Օպերայի և բալետի թատրոնում նույնպես միջոցառում կանցկացվի, որի ժամանակ կպարգևատրեն Երևանի պատվավոր քաղաքացիներ Երվանդ Մանարյանը և Միխայիլ Պիոտրովսկին։ Միևնույն ժամանակ Պետական սիմֆոնիկ նվագախումբն ու պետական ակադեմիական երգչախումբը կներկայացնեն Տիգրան Մանսուրյանի` «Հետևիր արևին, արի Երևան» ստեղծագործությունը։
«Էրեբունի» թանգարանը նոր մասնաշենք կունենա. պայմանագիրը կնքված է. տեսանյութ
«Ստեղծագործությունն արդեն գրված է, այժմ տեսահոլովակ են նկարահանում, որի պրեմիերան կկայանա մինչև հոկտեմբերի 18-ը», – նշեց Վիրաբյանը։
Նա ավելացրեց, որ այս տարի քաղաքի օրվա տոնակատարության համար բյուջեից 190 մլն դրամ կհատկացվի, որից 129 մլն–ը արդեն ծախսվել է 13 վարչական շրջաններում միջոցառումներ կազմակերպելու համար. շուրջ 46 մլն դրամ ծախսվել է տոնակատարության բրենդավորման վրա։
Համեմատության համար փոխքաղաքապետը ներկայացրեց անցած տարվա թվերը, երբ տոնակատարության համար նախատեսված էր 814 մլն դրամ, սակայն տեղավորվեցին 508 մլն-ի մեջ:
«Ընդ որում նախկինում կիրառում էին միջոցառումների և նվերների հովանավորության պրակտիկան, սակայն մենք նման մոտեցումը չեն ողջունում», – ասաց փոխքաղաքապետը։
Նշենք, որ «Էրեբունի–Երևանը» առաջին անգամ պաշտոնապես տոնել են 1968 թվականի հոկտեմբերին, երբ քաղաքը դարձավ 2750 տարեկան։ Հոբելյանական միջոցառումները մոտ մեկ շաբաթ են տևել։ Այդ ժամանակից տոնն ավանդական դարձավ և որպես կանոն նշվում է հոկտեմբերի երկրորդ շաբաթ օրը։