ԵՐԵՎԱՆ, 9 հոկտեմբերի — Sputnik. ՀՀ պաշտպանության նախարարությունը փոխհատուցում կտրամադրի 1998 թվականից ի վեր մարտական գործողությունների հետևանքով զոհված զինծառայողների հարազատներին։ Facebook-ում այս մասին գրել է ՀՀ ՊՆ մամուլի քարտուղար Արծրուն Հովհաննիսյանը` հայտնելով, որ համապատասխան որոշումն ընդունվել է այսօր նախարարությունում Զինծառայողների ապահովագրության հիմնադրամի նիստի ժամանակ։
«Նիստի ընթացքում որոշում կայացվեց աշխատանքներ իրականացնել հիմնադրամի շահառուների ցանկը էապես ընդլայնելու ուղղությամբ: Մասնավորապես, նախատեսվում է 2020 թվականի հունվարի 1-ից փոխհատուցել նաև 1998 թվականից ի վեր տեղի ունեցած դեպքերից տուժածների հարազատներին: Այսինքն 1998թ. մինչև այսօր»,– գրում է Հովհաննիսյանը։
Հիշեցնենք` մինչ այժմ փոխհատուցումը տարածվում էր 2008 թվականից հետո` վերջին 10 տարվա ընթացքում տեղի ունեցած դեպքերի վրա:
Հովհաննիսյանի խոսքով` փոխհատուցումների տրամադրումը ևս 10 տարվա կտրվածքով ավելացնելու որոշումը չափազանց կարևոր էր հազարավոր ընտանիքների համար:
«Հիմնադրամը հաստատուն քայլեր է անում, որ բոլոր զոհվածների փոխհատուցման խնդիրը հիմնավորապես լուծվի»,– նշել է ՊՆ խոսնակը։
Պաշտոնական տվյալներով` հիմնադրամն իր գործունեության ընթացքում ավելի քան 18 միլիարդ դրամ է հավաքել, որի շրջանակում փոխհատուցում է տրամադրվել զոհված զինվորների և սպաների ընտանիքներին, ինչպես նաև 1–ին և 2–րդ կարգի հաշմանդամություն ստացած զինծառայողներին։
Զոհված զինծառայողների ընտանիքներին և 1–ին կարգի հաշմանդամներին տրվող փոխհատուցումը տատանվում է 52-82 միլիոն դրամի սահմանում։ 52 միլիոն ստանում են շարքայինները, 72 միլիոն` ենթասպաները, 82 միլիոն` սպաները։ Ընդ որում, 10 միլիոնը տալիս են միանվագ, իսկ մնացածը` 20 տարվա ընթացքում (ամսական 200-300 հազար դրամ)։
Փաշինյանը զրուցեց զոհված զինծառայողների ծնողների հետ. վերջիններս դժգոհ մնացին
2–րդ կարգի հաշմանդամություն ունեցող անձանց վճարվում է 26-52 միլիոն դրամ փոխհատուցում` նույնպես կախված զինվորական կոչումից։ Դրանցից 5 միլիոնը տալիս են միանվագ, մնացածը` 20 տարվա ընթացքում (ամսական 100-200 հազար դրամ)։
Հիշեցնենք, որ հիմնադրամի գումարները ձևավորվում են Հայաստանի քաղաքացիների ամսական վճարումների հաշվին։ Գրանցված աշխատողներից յուրաքանչյուրն ամեն ամիս վճարում է 1000 դրամ։
Որքա՞ն են բարձրացել զինծառայողների աշխատավարձերը Հայաստանում