ԵՐԵՎԱՆ, 7 հոկտեմբերի — Sputnik. Բարձր տեխնոլոգիաները պետք է ներմուծվեն տարբեր ոլորտներ՝ լինի արդարադատություն, պետական կառավարում, գյուղատնտեսություն։ Այս մասին Երևանում անցկացվող Տեղեկատվական տեխնոգիաների «WCIT 2019» համաշխարհային համաժողովի շրջանակներում կայացած ասուլիսում ասաց ՀՀ փոխվարչապետ Տիգրան Ավինյանը։
«Մեր ջանքերով նպաստելու ենք, որ ՀՀ տնտեսության այդ տրանսֆորմացիան տեղի ունենա: Հայաստանում վերջին տարիների ընթացքում ՏՏ ոլորտը տարեկան աճում է միջինը 28 տոկոսով»,-ասաց Ավինյանը։
Նա կարծիք հայտնեց, որ ամենանշանակալին, որ կտա երևանյան համաժողովը Հայաստանին, նոր կապերն են։
«Կարծում եմ` մենք մեր տնային աշխատանքը շատ ճիշտ և գրագետ իրականացնում ենք։ Եվ ոլորտը, որն ունի այդ կապերը ստեղծելու և օգտագործելու հնարավորություն, պետք է այն բաց չթողնի»,– ասաց Ավինյանը։
ՀՀ տեխնոլոգիական բուհերի ոչ բոլոր շրջանավարտներն են պատրաստ աշխատել ՏՏ ընկերություններում
Նա հույս հայտնեց, որ ՏՏ ոլորտում ակնկալվող աշխատանքները Հայաստանում միայն համաժողովի անցկացմամբ չեն սահմանափակվի։