ԵՐԵՎԱՆ, 5 հոկտեմբերի — Sputnik. ՀՀ ոստիկանությունը բացահայտել է այս գիշեր Վանաձորում տեղի ունեցած հանցագործությունը։ Այս մասին հայտնում է ոստիկանության մամուլի ծառայությունը։
Միջանձնային հարաբերություններից առաջացած վիճաբանության ժամանակ 46-ամյա տղամարդը սպանություն կատարելու դիտավորությամբ իր «Մակարով» ատրճանակից կրակել է վիճաբանությանը ներկա անձանց ուղղությամբ։
Դեպքի վայրում հայտնաբերվել է նաև «Մակարով» տեսակի ատրճանակը, որի գործարանային համարը ջնջված է եղել։
Սպանություններով ավարտված վիճաբանությունը տեղի է ունեցել Վանաձորի Միչուրինի 20 հասցեի նկուղային հարկում։
Ոստիկանությունը հաստատում է նաև մամուլում մինչ այդ արդեն հայտնված տեղեկությունը սպանվածների ու վիրավորների մասին, որի համաձայն` մահացածներն են Վանաձոր քաղաքի բնակիչներ 30-ամյա Անդրանիկ Օհանյանը, 30-ամյա Գոռ Գրիգորյանը և 25-ամյա Դավիթ Օհանյանը, վիրավորները` 26-ամյա Գևորգ Գևորգյանը, 29-ամյա Լևոն Ժամհարյանը, 25-ամյա Լևոն Խաչատրյանը և 21-ամյա Անդրանիկ Թադևոսյանը:
Ինչպես արդեն հայտել էինք, սպանությունների համար կասկածվող տղամարդը հայտնաբերվել է, ձերբակալվել և տվել է խոստովանական ցուցմունք։
Հիշեցնենք` հոկտեմբերի 4-ին, ժամը 23:55-ին ոստիկանությունը Վանաձորի բժշկական կենտրոնից ահազանգ է ստացել, որ Միչուրինի փողոցի տներից մեկում բժիշկների հերթապահ խումբ է մեկնել, որտեղ հայտնաբերվել են երկու երիտասարդի դի: Հայտնել են նաև, որ մարմնական տարբեր վնասվածքներով Վանաձորի բժշկական կենտրոն են տեղափոխել մի քանի երիտասարդ:
Անմիջապես դեպքի վայր է մեկնել քննչական-օպերատիվ խումբը և նշված շենքի նկուղում հայտնաբերել 1989 թվականին ծնված երկու երիտասարդի դի (հրազենային վնասվածքներով):
Նույն հասցեից Լոռու մարզի 6 բնակիչներ տարբեր մարմնական վնասվածքներով տեղափոխվել են Վանաձորի բժշկական կենտրոն: Նրանցից մեկը՝ 1994 թվականին ծնված երիտասարդը, մահացել է հիվանդանոց տեղափոխվելու ճանապարհին:
Դեպքի վայրի զննության ժամանակ հայտնաբերվել են արնանման հետքեր, վերցվել նմուշներ: Հայտնաբերվել են «Մակարով» տեսակի ատրճանակ, 5,45մմ 6 պարկուճ, 2 գնդակ/, 9մմ 4 պարկուճ և 2 գնդակ, 9մմ գազային փամփուշտ և նույնատիպ 2 փամփուշտներ՝ պահունակի մեջ: Հայտնաբերվել են դանակներ, կանեփ բույսի նմանվող չորացված զանգված:
Առգրավվել են մահացածների հագին դեպքի պահին եղած հագուստները, որոնց վրա առկա են եղել արնանման հետքեր:
Sputnik Արմենիան ավելի վաղ հայտնել էր, որ ըստ տեղեկությունների` սպանվածների թվում է Վանաձորում որպես քրեական հեղինակություն հայտնի «ոչխարագողի տղա Անդրուշիկը», որը նախկինում դատապարտվել է սպանության համար։
Դեպքի առիթով հարուցվել է քրեական գործ, որի նախաքննությունը վարում է Քննչական կոմիտեն։
Ավելի վաղ տարածած հաղորդագրության մեջ ՔԿ–ն հայտնել էր, որ ձեռնարկվում են անհետաձգելի քննչական, օպերատիվ հետախուզական միջոցառումներ, դեպքի հանգամանքները պարզելու, մասնակիցների գործողություններն անհատականացնելու և նրանցից յուրաքանչյուրի գործողություններին քրեաիրավական գնահատական տալու վերաբերյալ:
Ծեծկռտուք Ուռուցքաբանականում. տնօրենի պաշտոնակատարը կոտրել է աշխատակցի քիթը