ԵՐԵՎԱՆ, 3 Հոկտեմբեր — Sputnik.Հայաստանի նախագահ Արմեն Սարգսյանը Սերբիայի նախագահ Ալեքսանդար Վուչիչի հրավերով կմեկնի Սերբիա։ Այս մասին տեղեկացնում է նախագահի աշխատակազմի հասարակայնության հետ կապերի վարչությունը։
Արմեն Սարգսյանը կնոջ` Նունե Սարգսյանի հետ Սերբիայի մայրաքաղաք Բելգրադ կմեկնի այսօր երեկոյան։ Այցի շրջանակում նախագահը հանդիպումներ կունենա Սերբիայի նախագահ Ալեքսանդար Վուչիչի, վարչապետ Անա Բռնաբիչի, խորհրդարանի նախագահ Մայա Գոյկովիչի, երկրի պատրիարք Իրինեյի հետ։ Հանդիպումներին կքննարկվեն հայ–սերբական հարաբերությունների ու համագործակցությունների զարգացման հնարավորություններն ու հեռանկարները։
Օրակարգում ծրագրված է, որ նախագահ Սարգսյանը կհանդիպի Սերբիայում հայ համայնքի հետ, կայցելի 1988-ի Սպիտակի երկրաշարժի օրերին Սերբիայից Հայաստան օգնություն բերելիս վթարի ենթարկված ինքնաթիռի սերբ օդաչուների հիշատակը հավերժացնող հուշակոթող։ Նա նաև ծաղիկներ կդնի Անհայտ հերոսի հուշարձանին։
Նշենք, որ Հայաստանի ու Սերբիայի Հանրապետությունների միջև պաշտոնական դիվանագիտական հարաբերություններ հաստատվել են 1993-ին։ Այդ տարվանից սկսած երկրների բարձրաստիճան պաշտոնյաները պարբերաբար այցելել են իրար։
Հայաստանը Սերբիայից սարքավորումներ և մետաղներ է ներկրում, արտահանում այնտեղ սննդամթերք։ Երկու օր առաջ` հոկտեմբերի մեկին, Եվրասիական բարձրագույն խորհրդի ընդլայնված կազմով նիստում Հայաստանի վարչապետ Նիկոլ Փաշինյանը հայտնեց, որ Սերբիայի ղեկավարության հետ ազատ առևտրի համաձայնագիր կնքելու շուրջ բանակցություններ են տարվում։