ԵՐԵՎԱՆ, 2 հոկտեմբերի — Sputnik. Պատմելու ի՞նչ կա, հանել ենք, նկարվել ենք։ Այսօր ԱԺ ամբիոնից այս մասին ասաց ՀՀ վարչապետ Նիկոլ Փաշինյանը` պատասխանելով «Իմ քայլը» խմբակցության պատգամավոր Միքայել Զոլյանի հարցին, թե ինչպես է նկարվել ԵԱՏՄ նիստից հետո միկրոավտոբուսում 5 երկրների ղեկավարների հանրահայտ սելֆին։
«Եթե դուք նկատի ունեք միջավայրը, երբ ղեկավարները պետք է միասին ինչ–որ միջոցառման մասնակցեն, նույն տրանսպորտային միջոցով են տեղաշարժվում, ապա դա ընդունված պրակտիկա է, ոչ մի արտառոց բան տեղի չի ունեցել»,– ասաց Փաշինյանը։
Պատգամավորը նաև նշեց, որ սելֆիի հրապարակումից հետ բոլորին հետաքրքրում էր` իսկ Լուկաշենկոն ո՞ւր է։
«Բելառուսի նախագահի ընտանիքում դժբախտություն էր պատահել, և որոշակի սգո միջոցառումներ կային, որոնց նա պետք է մասնակցեր, դրա համար մի փոքր ավելի վաղ մեկնեց Հայաստանից»,– ասաց Փաշինյանը։
ՀՀ վարչապետը նաև նշեց, որ Հայաստանում տեղի ունեցած ԵԱՏՄ բարձրագույն խորհրդի նիստն ու ընդլայնված նիստը կնպաստեն ԵԱՏՄ միջազգային հեղինակության ու գրավչության բարձրացմանը։
«Եվ ուրախ եմ, որ ՀՀ կառավարությունը կարողացել է որոշակի նպաստ ունենալ այս գործում»,– ասաց նա։
Փաշինյանը շեշտեց, որ ԵԱՏՄ–ի շրջանակում նման մասշտաբային միջոցառում մինչ այժմ տեղի չէր ունեցել։ Ուստի ՀՀ կառավարությունը բոլոր ջանքերը գործադրեց, որ ԵԱՏՄ–ն դառնա առավել արդյունավետ կառույց ու Հայաստանի նախագահությունն այդ կառույցում առավել նպատակային լինի։
Հիշեցնենք` հոկտեմբերի 1-ին Երևանում կայացավ Եվրասիական բարձրագույն տնտեսական խորհրդի նիստը` նեղ և ընդլայնված կազմով։
Նիստին մասնակցեցին Հայաստանի վարչապետ Նիկոլ Փաշինյանը, Ռուսաստանի նախագահ Վլադիմիր Պուտինը, Բելառուսի նախագահ Ալեքսանդր Լուկաշենկոն, Ղազախստանի նախագահ Կասիմ Ժոմարտ-Տոկաևը, Ղրղզստանի նախագահ Սոորոնբայ Ժեենբեկովը և Եվրասիական տնտեսական հանձնաժողովի կոլեգիայի նախագահ Տիգրան Սարգսյանը:
Ընդլայնված կազմով նիստին մասնակցեցին նաև Մոլդովայի նախագահ Իգոր Դոդոնը՝ որպես դիտորդի կարգավիճակում գտնվող երկրի ղեկավար, Իրանի նախագահ Հասան Ռոհանին ու Սինգապուրի վարչապետ Լի Սյեն Լուն՝ հրավիրյալ երկրների ղեկավարների կարգավիճակով:
ԵԱՏՄ անդամ ու գործընկեր երկրների ղեկավարները Երևանի Բաղրամյան 26 հասցեից հեռացան ոչ թե ծառայողական ավտոմեքենաներով, ինչպես կեսօրին ժամանել էին, այլ Mercedes Sprinter միկրոավտոբուսով։
Լրագրողները նկատեցին, որ Բելառուսի նախագահ Ալեքսանդր Լուկաշենկոն, Սինգապուրի նախագահ Լի Սյեն Լունը, ինչպես նաև Եվրասիական տնտեսական հանձնաժողովի (ԵՏՀ) կոլեգիայի նախագահ Տիգրան Սարգսյանը նախագահների ու ՀՀ վարչապետի հետ նույն ավտոմեքենան չնստեցին։
Փաշինյանը բացահայտել է` նախագահներից ով չի սիրում սելֆի անել, ու բացակաների կենացն են խմել
Միկրոավտոբուսում տեղավորվեցին ՀՀ վարչապետ Նիկոլ Փաշինյանը, ՌԴ նախագահ Վլադիմիր Պուտինը, Իրանի նախագահ Հասան Ռոհանին, Կասիմ Ժոմարտ–Տոկաևը, Ղրղըզստանի նախագահ Սոորոնբայ Ժեենբեկովն ու Մոլդովայի նախագահ Իգոր Դոդոնը։
Հյուրերը նախագահական նստավայրից ուղևորվեցին «Թումո» կենտրոն, որտեղ նախատեսված էր «Եվրասիական աշխարհամասի տարանցիկ ներուժը» համաժողովը։