ԵՐԵՎԱՆ, 1 հոկտեմբերի - Sputnik. Էրզրումի ղափամա, թփով տոլմա, խորոված, հորթի մատներ, գաթա․․․ Սինգապուրի վարչապետ Լի Սյեն Լունի գլխավորած պատվիրակությունը հայկական խոհանոցի ավանդական տարբեր կերակրատեսակներ է համտեսել «Լավաշ» ռեստորանում։ Հայկական խոհանոցի համն ու բույրը դուր է եկել սինգապուրցի բարձրաստիճան պաշտոնյաներին։ Sputnik Արմենիայի հետ զրույցում այս մասին ասաց ռեստորանի տնօրեն Վանիկ Գաբիրելյանը։
Հենց այս ռեստորանում են երեկ ճաշել Սինգապուրի վարչապետն ու պատվիրակության անդամները։ Գաբրիելյանի խոսքով՝ Հայաստանում Սինգապուրի դեսպանության աշխատակիցները հաճախ են այցելում իրենց ռեստորան, և որոշ ժամանակ առաջ արդեն տեղեկացրել էին վարչապետի այցելության մասին՝ նշելով, որ կցանկանան նրա համար այս ռեստորանում ճաշ մատուցել։ Ճաշացանկը նախապես է կազմվել, ընտրվել են այնպիսի կերակրատեսակներ, որոնք դեսպանության աշխատակիցներն իրենք են շատ հավանել և կարծել, որ իրենց վարչապետին էլ դուր կգա։
Գաբրիելյանի խոսքով՝ վարչապետին ու պատվիրակներին մատուցել են թփով տոլմա, Էրզրումի ղափամա, խորոված, հորթի մատներ` հատուկ սոուսով, գաթա և այլն։ Քանի որ մատուցվող ուտեստներն ավանդական հայկական են, յուրաքանչյուր կերակրատեսակ իր պատրաստման եղանակով նախապես ներկայացվել է վարչապետին։ Լի Սյեն Լունին տպավորել է այն հանգամանքը, որ իրեն մատուցվող գաթան «ռեկորդակիր է»։
Նրան պատմել են Երևանում ամեն տարի պատրաստվող ամենաերկար գաթայի արարողության և այն մասին, որ այն ստացել է աշխարհի «ամենաերկար գաթա» տիտղոսն ու գրանցվել Գինեսի ռեկորդների գրքում։
Իսկ ճաշի ավարտին վարչապետն ինքն է առաջարկել լուսանկարվել ռեստորանի անձնակազմի հետ որպես հիշողություն։
Նշենք, որ Սինգապուրի վարչապետ Լի Սյեն Լունին և նրա գլխավորած 25-հոգանոց պատվիրակությունը Հայաստանում է Եվրասիական տնտեսական բարձրագույն խորհրդի նիստին մասնակցելու համար։