ԵՐԵՎԱՆ, 1 հոկտեմբերի — Sputnik. Երևան-Մեղրի ավտոճանապարհի՝ Որոտանի ոլորաններում արդեն 2 օր լուրջ խցանումներ ու ավտոմեքենաների կուտակումներ են։
Պարզվում է` մեղավորը ավտոճանապարհի վերանորոգմամբ զբաղվող շինարարական ընկերությունն է։
Ինչպես հայտնում է shamshyan.com կայքը, շինարարական ընկերությունը, օրենքի պահանջով, նախազգուշացնող ցուցանակ է տեղադրել վերանորոգվող հատվածի մոտ։ Բայց ցուցանակի վրա այնպիսի տառասխալներ է արել, որ վարորդները չեն էլ հասկացել, թե ինչի մասին է հայտնում այն։
«Ճանապարհը փակ է բերնատների համար ժամը 09։00-18 00»,– գրում է կայքը։ Փաստորեն «բեռնատարներ» բառի փոխարեն ցուցանակի վրա «բերնատներ» է գրված ու նույնիսկ հայերեն իմացող վարորդները չեն հասկացել, թե ինչ է դա նշանակում։
Իսկ այդ ճանապարհով շատ ավելի հաճախ երթևեկող իրանցի վարորդներին այս ցուցանակն ընդհանրապես ոչինչ չի ասում։
Արդյունքում` Գորիսի բարձունքում 2 օր է բեռնատարների խցանումները չեն դադարում։