ԵՐԵՎԱՆ, 30 սեպտեմբերի — Sputnik. Քաղաքական գործիչ, «Ժառանգություն» կուսակցության խորհրդի նախագահ Րաֆֆի Հովհաննիսյանը կարծում է, որ բոլոր պետական պաշտոնյաները պետք է զուսպ լինեն, և դա վերաբերում է ինչպես ԱԱԾ պետին, այնպես էլ վարչապետին: Այս մասին նա ասաց այսօր լրագրողների հետ հանդիպման ժամանակ:
«Արթուր Վանեցյանի և Նիկոլ Փաշինյանի միջև տեղի ունեցած խոսքային փոխհրաձգությունը պատիվ չի բերում երկուսին էլ: Աշխարհն է մեզ նայում, վերլուծում»,- ասաց Հովհաննիսյանը։
Ըստ նրա՝ Ազգային անվտանգության ծառայության նախկին տնօրեն Արթուր Վանեցյանի և Հատուկ քննչական ծառայության պետ Սասուն Խաչատրյանի մասնակցությամբ տարածված գաղտնալսումները լուրջ կիքսեր էին։
Հիշեցնենք՝ սեպտեմբերի 16-ին Վանաձորում կայացած ասուլիսի ժամանակ ՀՀ վարչապետ Նիկոլ Փաշինյանը հայտարարել էր, որ ստորագրել է Ազգային անվտանգության ծառայության տնօրեն Արթուր Վանեցյանի աշխատանքից ազատման միջնորդագիրը։
Հայտարարությունից րոպեներ անց ՀՀ նախագահի պաշտոնական կայքում հրապարակվեց նաև Վանեցյանին ԱԱԾ տնօրենի պաշտոնից ազատելու մասին՝ ՀՀ նախագահ Արմեն Սարգսյանի հրամանագիրը։
«Արթուր Վանեցյանն իմ ընկերն է, միասին ճանապարհ ենք անցել». Սասուն Միքայելյան
Ավելի ուշ Արթուր Վանեցյանը հայտարարություն տարածեց իր հրաժարականի պատճառների մասին, որտեղ , մասնավորապես, հայտնում էր, որ հրաժարականի դիմում ներկայացնելու որոշումը ստեղծված իրավիճակում և գալիքի համատեքստում համարում է Հայաստանի Հանրապետությանն ու ժողովրդին ծառայելու ամենանախընտրելի և ամենահիմնավորված տարբերակը։
«Այս որոշումը ես կայացրել եմ նույնքան վստահ, որքան այն մեկը, երբ մեր երկրի համար բախտորոշ փուլում համաձայնվեցի ստանձնել Ազգային անվտանգության ծառայության տնօրենի պաշտոնը։ Մեկուկես տարվա իմ գործունեությունը միշտ բոլորիդ աչքի առջև է եղել, և ամեն քայլ արել եմ մեկ սկզբունքով` Հայրենիքն ու սպայի պատիվը վեր են ամեն ինչից»,–գրել էր Վանեցյանը:
Արձագանքելով Վանեցյանի հայտարարությանը` վարչապետի մամուլի քարտուղար Վլադիմիր Կարապետյանն ասաց, թե նախ պետք է պարզել` ով է գրել այդ տեքստը: Վանեցյանն էլ դրանից հետո հայտարարեց, որ տեքստն ինքն է գրել։
Ինչ է հուշում Փաշինյան-Վանեցյան առճակատումը. վարչապետը ծուղակո՞ւմ է հայտնվել
ՀՀ վարչապետ Նիկոլ Փաշինյանն էլ սեպտեմբերի 23-ին Լոս Անջելեսում լրագրողների հետ հանդիպման ժամանակ, անդրադառնալով Վանեցյանի հրաժարականի տեքստին, ասաց, որ սպան նման հայտարարություն չպետք է աներ. դա նշանակում է ուսադիրները գցել աղբամանը։ Վանեցյանի պատասխանն էլ չուշացավ` ժամանակը ցույց կտա, թե ով կամ ինչը կհայտնվի աղբանոցում։