ԵՐԵՎԱՆ, 30 սեպտեմբերի — Sputnik. Հայաստանի նախկին նախագահ Ռոբերտ Քոչարյանը մինչև հիմա մնում է «Իզմիրլյան» բժշկական կենտրոնում, ուր նա տեղափոխվել էր երկուշաբթի առավոտյան։ Այդ մասին Sputnik Արմենիային հայտնեց հիվանդանոցի տնօրեն Արմեն Չարչյանը։
«Հիմա Քոչարյանը բուժզննում է անցնում մեզ մոտ։ Ես հասկանալի պատճառներով չեմ կարող ասել, թե նա կոնկրետ ինչ խնդիրներ ունի։ Եվ դա վերաբերում է ոչ միայն նրան, այլև բոլորին»,- ասաց Չարչյանը։
«Ինչո՞ւ մի դեպքում քրգործ հարուցվեց, իսկ մեր դեպքում` ոչ». Քոչարյանի գործով նախկին դատավոր
Պատասխանելով մեր հարցին, թե ՀՀ երկրորդ նախագահը դեռ որքան կմնա հիվանդանոցում, Չարչյանը պատասխանեց, որ դա կախված է հետազոտությունից։ Եթե հարկ լինի, որ Քոչարյանը մնա` նա կմնա։
Հիշեցնենք` Երևանի ընդհանուր իրավասության դատարանը սեպտեմբերի 20-ին մերժեց ՀՀ երկրորդ նախագահ Ռոբերտ Քոչարյանին գրավի դիմաց ազատ արձակելու միջնորդությունը:
2018 թվականի հուլիսի 26-ին Մարտի 1-ի գործով Հատուկ քննչական ծառայությունում քննվող քրեական գործով Հայաստանի երկրորդ նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: