ԵՐԵՎԱՆ, 27 սեպտեմբերի — Sputnik. Սաուդյան Արաբիայի թագավորությունը հայտարարել է նոր վիզային ռեժիմի անցնելու մասին։ Դրա համաձայն` զբոսաշրջիկներն հիմա կկարողանան այդ երկիր այցելել։ Այս մասին հայտնում է Reuters–ը։
Ռեժիմն ուժի մեջ է մտել այսօր։ Դրա շնորհիվ 49 երկրի քաղաքացիները հնարավորություն կունենան տեսնել մուսուլմանական թագավորությունը։ Զբոսաշրջային վիզան կարժենա 80 դոլար, այն անգամ հասանելի կլինի միայնակ կանանց։
Զբոսաշրջության ազգային հանձնաժողովի նախահագը հայտնել է, որ արտասահմանցի կանանց համար պարտադիր չէ աբայա հագնել (ավանդական մահմեդական զգեստ), սակայն նրանք պետք է համեստ հագնվեն, այդ թվում նաև` հանրային լողափներում։
Նշվում է, որ մուսուլմանական սրբատեղիների, օրինակ` Մեքքա կամ Մեդինա քաղաքների մուտքը սահմանափակ է լինելու։
Սաուդյան Արաբիայի վիզային ցուցակում հայտնված երկրների անունները կհրապարակվեն ավելի ուշ։ Սակայն հանձնաժողովի նախագահը նշել է, որ դրանց շարքում են ԱՄՆ–ն, Չինաստանը, Ճապոնիան և որոշ եվրոպական երկրներ։
«Իրականում». Սաուդյան Արաբիայի վրա հարձակումից հետո Արևմուտքում կարծիքները կիսվել են
Մինչ 2019 թվականի սեպտեմբերը Սաուդյան Արաբիա կարող էին մուտք գործել միայն գործնական վիզաներով կամ ուխտագնացության նպատակով։ Մեքքա ու Մեդինա այցելելու համար հատուկ վիզաներ էին տրամադրում։ Զբոսաշրջիկներին վիզա տրամադրելու հարցը տարիներ շարունակ քննարկվել է, սակայն պահպանողականության և ավելորդ թղթաբանության պատճառով այն չէր հաջողվում կյանքի կոչել։