ԵՐԵՎԱՆ, 27 սեպտեմբերի — Sputnik. Վայոց Ձորի մարզի Ելփին, Արենի ու Խաչիկ համայնքներում այսօր բացվեցին ֆուտբոլի դաշտեր։
Այս լուրը Facebook-ի իր պաշտոնական էջում «Ուրախ լուր» նախաբանով գրել է ՀՖՖ նախագահի խորհրդական Զոհրաբ Եգանյանը։
Եգանյան. «Ֆուտբոլի զարգացումը համակարգային դարձնելու պատմական հնարավորություն ունենք»
«ՀՖՖ-ի կողմից կառուցվող այս դաշտերը, թերևս, անկախությունից հետո մարզերում իրականցված ամենախոշոր ծրագրերից է։ Բացումն արեց ՀՖՖ նախագահ Արթուր Վանեցյանը։ Միայն տեսնել է պետք այս մարդկանց ուրախությունը, երեխեքի հրճվանքը»,–գրել է Եգանյանը և իր գրությունն ամփոփել #հֆֆնաշխատումէ հեշթեգով։
Հիշեցնենք, որ Նյու Յորքում հայ համայնքի հետ հանդիպման ժամանակ ՀՀ վարչապետ Նիկոլ Փաշինյանն ասել էր, որ մինչև տարեվերջ ՀՀ մարզերում արհեստական ծածկով ավելի քան 50 ֆուտբոլի դաշտ կբացվի։
ՀՖՖ նախագահ Արթուր Վանեցյանը դեռ մայիսի 23–ին հայտնել էր, որ նոր մարզադաշտ պետք է կառուցվի ու այն նաև ժամանցային վայր է կլինի. 10-ից 15 հեկտար մարզադաշտի հարակից տարածքը կանաչապատ այգի կլինի։
Նշենք, որ սեպտեմբերի 16–ից ԱԱԾ տնօրենի պաշտոնից ազատված Արթուր Վանեցյանը շարունակում է գլխավորել Հայաստանի ֆուտբոլի ֆեդերացիան։