ԵՐԵՎԱՆ, 27 սեպտեմբերի — Sputnik. ԵԿՄ փոխնախագահի սպանությունից ավելի քան մեկ տարի անց քրեական գործի նախաքննությունն ավարտվել է։
ՀՀ քննչական կոմիտեի ՀԿԳ (Հատուկ կարևորության գործերով) քննության գլխավոր վարչության մարդու դեմ ուղղված հանցագործությունների վարչությունում քննվող գործով մեղադրանք է առաջադրվել Էջմիածնի 51-ամյա բնակչին:
Նախաքննության ընթացքում պարզվել են սպանության մի շարք հանգամանքներ, այդ թվում` շարժառիթը, դեպքի վայրը և ենթադրյալ հանցագործություն կատարած անձի ինքնությունը, ով հանդիսանում է Արմավիր մարզի բնակիչ՝ ծնված 1967 թվականին:
Պարզվել է նաև, որ Էջմիածին քաղաքի բնակիչ 51-ամյա տղամարդը դեպքի օրը Էջմիածնի Կոմիտասի հուշարձանի հարակից տարածքում իրեն դիտողություն անելու պատճառով ծագած վիճաբանության ժամանակ իր մոտ եղած դանակով հարվածել է նրա կրծքավանդակին՝ պատճառելով կյանքին վտանգ սպառնացող մարմնական ծանր վնաս և դիմել փախուստի:
Հիշեցնենք, 2018 թվականի ապրիլի 23-ին՝ ժամը 18:55-ին, կրծքավանդակի աջ կեսի կտրած-ծակած վնասվածքով «Էջմիածին» բժշկական կենտրոն էր տեղափոխվել 1972թ. ծնված Նվեր Հովհաննիսյանը, ով ԵԿՄ փոխնախագահն էր։
Նա ենթարկվել էր վիրահատության, բայց կյանքը փրկել չէր հաջողվել։
Նկատի ունենալով, որ դանակահարողը թաքնվել էր քննությունից՝ նրա նկատմամբ հայտարարվել էր հետախուզում, իսկ որպես խափանման միջոց` ընտրվել կալանավորումը: 2019թ. մայիսի 23-ին հետախուզվողը հայտնաբերվել էր, ձերբակալվել, ապա կալանավորվեր։
Քննչական կոմիտեից հայտնում են, որ նրան մեղադրանք է առաջադրվել՝ ՀՀ քրեական օրենսգրքի 104-րդ հոդվածի 1-ին մասով (սպանություն)։
Նախաքննությունն ավարտվել է։