ԵՐԵՎԱՆ, 26 Սեպտեմբեր — Sputnik. Մարտի 1-ի զոհերի համար իրական մեղավորներին գտնելու անկարողությունը քողարկելու նպատակով փորձ է արվում քրգործում հնարավորինս մեծ թվով հնչեղ անուններ ներգրավել` ստեղծել արդյունավետ գործունեության պատրանք: Այս մասին իր տարածած հայտարարության մեջ նշել է ՀՀ նախկին գլխավոր դատախազ Գևորգ Կոստանյանը։
Նշենք, որ Հատուկ քննչական ծառայությունից Sputnik Արմենիային հայտնել էին, որ Մարտի 1–ի գործով Կոստանյանը հրավիրվել է ՀՔԾ։ Նա, սակայն, ասել է, որ արտերկրում է և 15-20 օրից միայն կվերադառնա։
Երեկ այդ քրգործով մեղադրանք էր առաջադրվել ՀՀ նախկին ոստիկանապետ Ալիկ Սարգսյանին. մեղադրանքում շոշափվում էր նաև Կոստանյանի անունը։
«Մամուլից տեղեկացա, որ ոստիկանության նախկին պետ Ալիկ Սարգսյանին մեղադրանք առաջադրելու որոշման մեջ առկա են նաև իմ և իմ հանգուցյալ ընկեր Գևորգ Մհերյանի (նախագահի օգնական, ոստիկանության պետի տեղակալ) անունները։ Ես և Մհերյանը մեղադրվում ենք ոստիկանության պետին ինչ-որ ցուցումներ ու հանձնարարականներ տալու մեջ, ինչն, ի դեպ, հերքում է հենց այդ մտացածին ցուցումների և հանձնարարականների հասցեատեր Ալիկ Սարգսյանը:
«Մարդկանց մոտ տպավորություն կա, որ դատական համակարգն ամենավատն է. նման բան չկա». նախարար
Նրա խոսքով` իր և Գևորգ Մհերյանի անվան հետ կապվող մեղադրանքներում առողջ բանականությունից բացի, բացակայում են նաև իրավական հիմքերը:
Կոստանյանը համոզված է, որ եթե նույնիսկ ՀՀ «նոր» իրավապահ համակարգը մեղադրանք առաջադրի և կալանավորի 2008-2018թթ. որևէ պաշտոն զբաղեցրած բոլոր անձանց, միևնույնն է, դրանով չի մոռացվելու հարցը, թե, ի վերջո, ո՞վ կամ ովքե՞ր են Մարտի 1-ի տասը զոհերի և հարյուրավոր վիրավորների իրական պատասխանատուները:
Նա կարծում է, որ քրեական իրավունքի դասագրքերը մեր երկում այլևս արժեք չունեն և ենթակա են փոփոխման, քանի որ մերօրյա «իրավաբանների» իրականացրած քրեական արդարադատությունն ուղղակի հակասության մեջ է անգամ դասագրքային ճշմարտությունների հետ: Կոստանյանը նաև ընդգծել է, որ ՀՀ օրենսդրությամբ և միջազգային պայմանագրերով նախատեսված բոլոր հնարավորություններն օգտագործելու է այս անհեթեթ մեղադրանքներից իր, ինչպես նաև Մհերյանի անունը պաշտպանելու համար:
«Մյուս կողմից, ցանկանում եմ հիշեցնել մեր ողջ իրավապահ համակարգին, որ նրանք, ովքեր իրենց գործունեության ընթացքում թույլ կտան կամ արդեն թույլ են տվել ապօրինություններ, անպայման կրելու են անձնական քրեական և բարոյական պատասխանատվություն»,–նշում է Կոստանյանը։
Նա իր խոսքն ամփոփել է` գրելով, որ մեղսագրվող արարքների մասին ընդհանրապես և հանցակազմի հատկանիշների մասին` մասնավորապես, հանգամանորեն կխոսի ավելի ուշ:
Հարությունյանի մահվան հանգամանքները պարզելու համար հարցաքննվել է նրա հետ գտնվող անձը
Հիշեցնենք, որ ըստ Ալիկ Սարգսյանին առաջադրված մեղադրանքի` 2008–ի մարտի 1-ին և 2-ին Երևանում տեղի ունեցած իրադարձություններից հետո Գևորգ Կոստանյանը և Գևորգ Մհերյանը պահանջել են հետին ամսաթվով կազմել և շրջանառության մեջ դնել մարտի 1-ին և 2-ին ոստիկանության կողմից կատարված գործողությունների իրավաչափությունը հիմնավորող փաստաթղթեր:
Ալիկ Սարգսյանին մեղադրանք է առաջադրվել Մարտի 1–ի հանցագործությունը պարտակելու համար
Խորհրդակցությունից հետո ՀՀ ոստիկանության պետ Ալիկ Սարգսյանը և ՀՀ ոստիկանության մի խումբ բարձրաստիճան պաշտոնատար անձինք ձեռնամուխ են եղել Գևորգ Կոստանյանի և Գևորգ Մհերյանի ցուցումներն ու հանձնարարությունները կատարելուն: