ԵՐԵՎԱՆ, 25 սեպտեմբերի - Sputnik. Մարտի 1-ի գործով վկաների վրա ճնշում գործադրող անձինք կպատժվեն։ Այս մասին լրագրողների հետ զրույցում ասաց ՀՀ գլխավոր դատախազ Արթուր Դավթյանը։
25 սեպտեմբերի 2019, 13:16
«Համապատասխան քայլեր ձեռնարկվել և ձեռնարկվում են։ Դրանք հասկանալի պատճառներով գաղտնի ռեժիմով են արվում, բայց արվում են», - նշեց դատախազը։
Դավթյանի խոսքով` եթե որևէ անձ կամ անձինք փորձեն ճնշում գործադրել Մարտի 1-ի գործով վկաների վրա, նրանք կբացահայտվեն և կպատժվեն։
Հիշեցնենք, որ մարտի 1-ի գործում ներգրավված է շուրջ 800 վկա։ Նրանց շարքում նշվում էր նաև նախկին ոստիկանապետ Հայկ Հարությունյանի անունը, որի դին սեպտեմբերի 23-ին հայտնաբերվել էր Բջնիի իր առանձնատանը։