Սուրեն Սարգսյանը կարծում է, որ պետք է նկատի ունենալ մի կարևոր հանգամանք, որ վարչապետ Փաշինյանի այցը երկկողմ հարաբերությունների առումով որևէ օրակարգ չունի։
«Երկկողմ հարաբերությունների մասով այստեղ ասելու որևէ բան չկա, քանի որ վարչապետի այս այցի ընթացքում երկկողմ որևէ հանդիպում ԱՄՆ-ի նախագահի կամ պետքարտուղարի հետ նախատեսված չէ»,-նկատում է Սուրեն Սարգսյանը։
Ինչ վերաբերում է ՄԱԿ-ում ՀՀ վարչապետ Նիկոլ Փաշինյանի ելույթին, ապա Սուրեն Սարգսյանը կարծում է, որ ճիշտ չի լինի, որ Փաշինյանը ՄԱԿ-ի ամբիոնից կրկին խոսի «թավշյա հեղափոխության» մասին։
«Այդ օրը ՄԱԿ-ի 74-րդ նստաշրջանում ներկա գտնվող աշխարհի տարբեր պետությունների առաջնորդների կամ որևէ իշխանության համար հեղափոխության գաղափարը այդքան էլ հետաքրքիր ու դրական թեմա չէ, նույն այն տրամաբանությամբ, որքան ընկալելի երևույթ չէ ՀՀ իշխանությունների համար հակահեղափոխականության երևույթը։ Վարչապետն իր ելույթում ավելի շատ պետք է կենտրոնանա արտաքին քաղաքական հարցերին, Հայաստանի առջև ծառացած մարտահրավերներին»,-կարծում է միջազգայնագետ Սուրեն Սարգսյանը։
Խոսելով Միացյալ նահանգներում 2020 թվականի նոյեմբերին սպասվող նախագահական ընտրությունների ժամանակ ամերիկահայության դերի մասին` միջազգայնագետը կարծում է, որ չնայած հայ համայնքի մեծությանը, հզորությանն ու ազդեցությանը, պետք է հաշվի առնել մի քանի կարևոր առանձնահատկություններ, որոնք հաշվի է առնում նաև ԱՄՆ-ի նախագահ Դոնալդ Թրամփը, որը պատրաստվում է մասնակցել այդ ընտրություններին։
Իմ եղբայրն էլ Հայաստանից հեռացել, Ռուսաստանում է ապրել. Փաշինյանը՝ ԱՄՆ-ում
«Հայ համայնքն, իհարկե, չափազանց կարևոր նշանակություն ունի կոնգրեսականների և սենատորների համար, որովհետև եթե դու ցանկանում ես լինել Կոնգրեսի կամ Սենատի անդամ, ապա պետք է ակտիվ աշխատես քո ընտրողների հետ։ Այդ իմաստով Կալիֆոռնիայի հայ ընտրողները բավականին ակտիվ են, և բոլոր թեկնածուները գալու են հայկական ձայները խնդրելու»,-փաստում է Սարգսյանը։
Ինչ վերաբերում է նախագահական ընտրություններին, ապա այդ պարագայում, ըստ միջազգայնագետի, իրավիճակը բավականին հետաքրքրիր է այն առումով, որ Թրամփը հայկական ձայների անհրաժեշտությունն ու կարիքը չունի, քանի որ հայ համայնքը կենտրոնացած է այն նահանգներում, որոնք միշտ ընտրում են դեմոկրատներին։