ԵՐԵՎԱՆ, 23 սեպտեմբեր — Sputnik. Հայաստանը ջանքեր է գործադրում մինչ տարեվերջ Ռուսաստանում հայկական վարորդական իրավունքի անցողիկության հարցը լուծելու համար։ Այս մասին հայտնեց ՀՀ Ազգային ժողովի տարածաշրջանային և եվրասիական ինտեգրման հարցերի մշտական հանձնաժողովի նախագահ Միքայել Մելքումյանը` Մոսկվայում Պետդումայի պատգամավորների պատվիրակության հետ հանդիպումից հետո։
Նա նշեց, որ հարցը ներկայացվել է ռուս գործընկերներին, կողմերը պայմանավորվել են քննարկել այն։
«Մենք նշեցինք, որ ԵԱՏՄ–ում միասնական շուկա է գործում։ Իսկ դա նշանակում է, որ ԵԱՏՄ անդամ երկրներից մեկը մյուս երկրների քաղաքացիների համար չպետք է աշխատանքի տեղավորվելու հարցում լրացուցիչ խոչընդոտներ ստեղծի։ Մեր ռուս գործընկերները խոստացան ուսումնասիրել հնարավորություններն ու համապատասխան փոփոխություններ մտցնել ռուսական օրենսդրության մեջ»,– ասաց Մելքումյանը։
Հիշեցնենք` ըստ ՌԴ օրենսդրությանը, աշխատանքի ընդունվելիս վավերական են միայն այն երկրների վարորդական իրավունքները, որտեղ ռուսերենը պաշտոնական կարգավիճակ ունի, այդ պատճառով Ռուսաստանում վճարովի աշխատանքի համար ճանաչվում են ԵԱՏՄ անդամ բոլոր երկրների վարորդական իրավունքները, բացի Հայաստանից։
Քոչարյանը մեկնաբանել է Ռուսաստանում հայկական վարորդական իրավունքի ճանաչման հարցը
Սեպտեմբերի սկզբին Հայաստանի խորհրդարանը պատասխան միջոց է կիրառել. հանրապետությունում վճարովի աշխատանք իրականացնելու համար օտար պետությունների վարորդական իրավունքը չեն ճանաչվում։ Բացառություն են միայն ԵԱՏՄ երկրները, բայց փոխադարձ լինելու պայմանով։