ԵՐԵՎԱՆ, 23 սեպտեմբերի — Sputnik. Երրորդ երկրներին զենք վաճառելու հարցը կքննարկվի Հայաստանի ու Ռուսաստանի պատգամավորների, նաև ՀԱՊԿ գործընկերների հետագա հանդիպումների ժամանակ։
Որոշ երկրներում ռուսական զենքի վաճառքի հարցը բարձրացվել է ու գործընկերներն ըմբռնումով են մոտեցել դրան։ Այս մասին ասաց ՀՀ Ազգային ժողովի տարածաշրջանային և եվրասիական ինտեգրման հարցերի մշտական հանձնաժողովի նախագահ Միքայել Մելքումյանը Մոսկվայում Պետդումայի պատգամավորների պատվիրակության հետ հանդիպումից հետո։
Նրա խոսքով՝ նիստի ընթացքում բազմաթիվ հարցեր են քննարկվել, այդ թվում՝ ՀԱՊԿ անդամ երկրների կողմից զենքի վաճառքն այն պետություններին, որոնք խնդիրներ ունեն ՀԱՊԿ անդամ երկրներից մեկի հետ:
«Իհարկե, Ռուսաստանը զենք է վաճառում իր պետական շահերից դրդված։ Բայց եթե առաջարկվում է բարձր հզորությամբ ու գործողության հեռավոր շառավղով հարձակողական զենքի վաճառքը երրորդ երկրներին, չի կարող անհանգստություն չառաջացնել, նույնիսկ հաշվի առնելով, որ Հայաստանը նույն զենքն արտոնյալ գներով է ստանում։ Ամեն դեպքում Հայաստանը ՀԱՊԿ–ում Ռուսաստանի դաշնակիցն է, ի տարբերություն Ադրբեջանի»,– ասաց Մելքումյանը։
Ադրբեջանը խմբագրե՞լ է սխալը. Ծերեթելին Փաշինյանի հայտարարությանը չի անդրադարձել
Նա նշեց, որ հարցը քննարկվել է Պետդումայի ԱՊՀ գործերով, Եվրասիական ինտեգրման և հայրենակիցների հետ կապերի կոմիտեի ղեկավար Լեոնիդ Կալաշնիկովի, Պետդումայի փոխխոսնակ Պյոտր Տոլստոյի ու նրանց գործընկերների հետ։ Որոշվել է այն քննարկել նաև Հայաստանի ու Ռուսաստանի պատգամավորների` ՀԱՊԿ–ի գործընկերների հետ հանդիպման ժամանակ։
Ադրբեջանը կարո՞ղ է ՀԱՊԿ–ում կարգավիճակ ստանալ. պատասխանում է ՌԴ փոխվարչապետը
Հիշեցնենք` Ռուսաստանի Անվտանգության խորհրդի քարտուղար Նիկոլայ Պատրուշևի հայաստանյան այցի ժամանակ երրորդ երկրների զենք մատակարարելու հարցը քննարկվել է ՀՀ Անվտանգության խորհրդի քարտուղար Արմեն Գրիգորյանի հետ։