ԵՐԵՎԱՆ, 21 սեպտեմբերի –Sputnik. Անկախության օրը Գյումրիում նշելը նպաստում է ներքին զբոսաշրջության զարգացմանը։ Այս մասին «Համայնքների համաչափ զարգացման տեսլականը» թեմայի շուրջ հանրային քննարկումների ժամանակ ասաց Գյումրու փոխքաղաքապետ Ռուբեն Սանոյանը։
Հիշեցնենք, որ Հայաստանն այսօր նշում է Անկախության 28-ամյակը։ Հիմնական միջոցառումներն առաջին անգամ անցկացվել են ոչ թե մայրաքաղաք Երևանում, այլ Գյումրիում։
Փոխքաղաքապետի խոսքով` նման նախաձեռնությունները ողջունելի են։
«Մեր հանրապետությունում շատ մարդիկ կան, որոնք երբեք Գյումրիում չեն եղել։ Իսկ հիմա նրանք կգան, կծանոթանան քաղաքի մշակույթին, կզգան նրա կոլորիտը։ Բացի այդ, այստեղ եղած մեկը, կարող է իր տեսածը պատմել տաս ուրիշների», – ասաց Սանոյանը։
Գյումրու «Ասպարեզ» լրագրողների ակումբի նախագահ Լևոն Բարսեղյանն իր հերթին նշեց, որ համայնքների համաչափ զարգացման համար լուրջ և ավելի խորքային փոփոխություններ են պետք, որոնք նախևառաջ տեղական ինքնակառավարման մարմինների իրավասությունների ընդլայնում են ենթադրում։
Նրա կարծիքով` տոնական միջոցառումներն այստեղ անցկացնելու որոշումն ապակենտրոնացման բաղադրիչներից մեկն է, սակայն այն բավականին թույլ բաղադրիչ է։
«Համայնքների համաչափ զարգացման, Երևանը բեռնաթափելու համար լուրջ օրենսդրական փոփոխություններ են անհրաժեշտ։ Օրինակ` մշակույթի պետական օջախները կարելի է տեղական ինքնակառավարման մարմինների տնօրինմանը հանձնել։ Թանգարանները, պատկերասրահներն ու թատրոնները դրանից որևէ կերպ չեն տուժի, սակայն որակապես կբարելավի տեղական ինքնակառավարման մարմինների աշխատանքը, կավելանա նրանց բյուջեն», – ասաց նա։
Բարսեղյանի խոսքով, Հայաստանի մարզերի բնակիչները գալիս են Երևան ավելի բարեկեցիկ կյանքի համար։
Ավելի վաղ ՀՀ վարչապետ Նիկոլ Փաշինյանը հայտարարել էր, որ ներկայիս կառավարությանը ժառանգություն է հասել գերկենտրոնացված իշխանություն, սակայն դրա ապակենտրոնացումն առաջիկա 5 տարիների ընթացքում կդառնա ՀՀ կառավարության գործունեության առաջնահերթություններից մեկը։