ԵՐԵՎԱՆ, 20 սեպտեմբերի– Sputnik. Նուր-Սուլթանում շարունակվող Ըմբշամարտի աշխարհի առաջնությունում այսօր Հայաստանի հավաքականի կազմում գորգ դուրս եկան ազատ ոճայիններ Վարուժան Կաջոյանն ու Լևան Բերիանիձեն: Ցավոք, մեր երկու ըմբիշներ էլ պարտություն կրեցին:
74 կգ քաշային կարգում Կաջոյանն իր առաջին գոտեմարտում 10:2 հաշվով պարտության մատնեց լիտվացի Անդրիուս Մաժեյկային, բայց 1/8 եզրափակիչում հայ ըմբիշը զիջեց ուկրաինացի Վասիլ Միխաիլովին:
Գերծանր քաշային կարգում Լևան Բերիանիձեն պարտվեց առաջին իսկ գոտեմերատում: Դժվարին ու ծանր պայքարում Հայաստանը ներկայացնող ըմբիշը 2:3 հաշվով պարտվեց ուկրաինացի Ալեքսանդր Խոցիանիվսկիին։
Այժմ հայ ըմբիշները կարող են միայն բրոնզե մեդալի հավակնել, եթե նրանց պարտության մատնած մրցակիցները հասնեն եզրափակիչ։
Արթուր Ալեքսանյանը դիմել է երկրպագուներին
Հայաստանի ազատ ոճի հավաքականից դեռևս գորգ դուրս չեն եկել 79 կգ քաշային Գրիգոր Գրիգորյանը և 86կգ քաշային Հովհաննես Մխիթարյանը:
Հիշեցնենք, որ մրցումների առաջին օրը մեր հավաքականի կազմում գորգ էին դուրս եկել Եվրոպայի երիտասարդական առաջնության հաղթողներ Արսեն Հարությունյանն ու Վազգեն Թևանյանը, որոնք մեկական հաղթանակ տոնելուց հետո պարտվեցին: