ԵՐԵՎԱՆ, 20 սեպտեմբերի — Sputnik.Հայաստանը կշարունակի աշխատել իր քաղաքացիներին Ադրբեջանից վերադարձնելու ուղղությամբ։ Այսօր այս մասին ասաց Հայաստանի պաշտպանության նախարար Դավիթ Տոնոյանը լիբանանցի գործընկեր Էլիաս Աբու Սաաբի հետ համատեղ մամուլի ասուլիսում` մեկնաբանելով երկու երկրների քաղաքացիներին փոխանակելու հարցը։
Ավելի վաղ Ադրբեջանը հայտարարել էր, որ պատրաստ է Տավուշի մարզի բնակիչ Կարեն Ղազարյանին և զինծառայող Արայիկ Ղազարյանին փոխանակել ադրբեջանցիներ Դիլհամ Ասկերովի և Շահբազ Գուլիևի հետ, որոնք դատապարտվել են Արցախում։
«Ես երեկ հանդիպել եմ Կարմիր Խաչի միջազգային կոմիտեի հայաստանյան ներկայացուցչի հետ։ Ինձ պաշտոնապես փոխանցվել է Ադրբեջանի պաշտոնական առաջարկությունը։ Որոշակի հարցեր կան, որոնք հիմա չեմ կարող բացահայտել», – ասաց Տոնոյանը։
Նրա խոսքով` հավելյալ աշխատանք է պահանջվում որոշ տեղեկություն ճշտելու համար։ Երբ այդ տեղեկությունը ստանան, ապա հայկական կողմը համապատասխան արձագանք կտա։
«Մենք սկզբունքորեն դեմ չենք, որ Հայաստանի քաղաքացիներին վերադարձնեն իրենց տներ և աջակցելու ենք այդ գործընթացին», – ասաց Տոնոյանը։
Նա նշեց, որ խոսքը փոխանակման մասին չէ։ Նախարարը հավասարության նշան չի դնում Ադրբեջանում գտնվող Հայաստանի քաղաքացիների և Արցախում գտնվող Ադրբեջանի քաղաքացիների կարգավիճակի միջև։
«Ես փոխանակման տեսանկյունից չեմ դիտարկում, դա ճիշտ մոտեցում չէ առնվազն պաշտպանության նախարարի կողմից։ Ես աշխատում եմ իմ քաղաքացիներին վերադարձնել Հայաստան»,- ասաց նախարարը։
Նա չբացառեց, որ փոխանակումը հնարավոր է, բայց ընդգծեց, որ դա «Լեռնային Ղարաբաղի սուվերեն որոշման խնդիրն է»։
Նշենք, որ նշված ադրբեջանցիներն արդեն 5 տարի Շուշիի քրեակատարողական հիմնարկում են։ 2014-ի հունիսին երեք ադրբեջանցուց բաղկացած դիվերսիոն խումբն անցել էր Արցախի տարածք, առևանգել և դաժանաբար սպանել 16-ամյա Սմբատ Ցականյանին։ Ոստիկանները վնասազերծել էին Հասան Հասանովին, սակայն մահանալուց առաջ նա հասցրել էր սպանել նաև մայոր Սարգիս Աբրահամյանին։ Արցախի դատարանը խմբի անդամ Դիլհամ Ասկերովին դատապարտել է ցմահ ազատազրկման, իսկ Շահբազ Գուլիևին` 22 տարվա ազատազրկման։